E 2,900 e ajtijoxel che eqa’lenelab’ rech ri PNC xmajtaj katijoxik

289

Pa le rachoch k’olib’al ri Tijob’al kech taq Taqanelab’ rech ri Wokajil Ajchajil Tinamit (PNC) xb’antaj wi ri nim molinik rech k’utb’al kumal Q’atb’altzij rech ri Ministerio rech Gobernación ri’, kumal ri Taqanelab’ xuquje’ ri k’amal b’e rech taq Tijob’al ri kakitijoj wi kib’ ri k’ak’ eqa’lenelab’ rech ri PNC ri’.

Pa le nim molinik ri’ xtatb’en wi ri Viceministro rech Ya’olchajinik, Ricardo Guzmán, ri xub’an kik’ulik ri e 2,900 chi alab’om alitom ri’ ri ronojel kepe pa ronojel taq tinamit pa we amaq ri’ qas xb’an kicha’ik ri’, rech te k’u ri’ xetaq b’ik ri’ pa taq le Tijob’al rech Santa Rosa, pa Chinab’jul xuquje’ pa Uk’u’x Nimatinamit ri k’o pa zona 6 ri’.

Eri Viceministro Guzmán xub’ij che ri eqa’lenelab’ rech ri PNC pa chuwe’q kab’ij, xe’upixb’ej rech qastzij b’a’ kakitijoj kib’ xuquje’ xub’ij rech ke’ok che kipatan pa le kanimaxik ri winaq tinamit ri’.

“Eri nab’e uwach kichak kakib’an ri’ are kakinimaj kuwach ri winaqilal ri’ ri e sachom kanoq, ri chomam taj ri rajawaxik chi ke, eri ix ix patanelab’ rajawaxik b’a’ kiya’ ik’u’x che we chak patan ri’, rumal ri’ we kamik sib’alaj kow chtijoj iwib’ b’a’ rech rech te k’u ri’ kixok pa le nimanik pa le chak patan ri’”, xcha’ ri Guzmán.

Eri ajtijoxela’ rech ke’ok che eqalenelab’ rech ri PNC, k’o nim etab’anik xe’ek’owisax wi pa taq le tijob’al ri’, jeri’ xetaxik we e utz kuwach ri’ jeri’ pa kino’jib’al kichomab’alil ri’, xuquje’ k’o k’otowtzij xb’an chi ke xuquje’ xilik ub’anikil kirajilal pa taq kachochib’al ri’, are wa’ xb’an kumal ri ajtaqanelab’ rech ri Sección rech Rajchak rech taq ri Comisarías, xcha’ ri Subcomisario Nixon Ramírez, ajpata pa le Junta Evaluadora ri’.

Are wa’ le nab’e kuwach le jun puq ajtijoxela’ pa we junab’ ri’ le kamajtaj katijoxik ruk’ taq nima’q’ taq uwach tijob’enik chi ke rech te k’u ri’ ke’ok che PNC ri’, pa konojel k’ut e k’o ri’ e 13 mil chi winaqilal ri xkikoj pa taq le etab’anem ri’, rumal ri’ xechotaj ri’ e 2 mil 300 chi achijab’ xuquje’ e k’o 630 ixoqib’ chi ke ri’, ri no’jimal xecha’ik konojel k’ut kitz’aqatsim ronojel ri wujil xta chi ke xuquje’ ri kib’anikil are xilik e utz taq winaq ri’, e nimanel ri’, ri xekowinik xe’ok pa le tijob’en ib’ ri’.

Eri ajtijoxela’ ri’ are kakimaj uwach tijob’enik chi ke pa le ik’ febrero, oxib’ kuwach k’ut kab’an chi ke aretaq kejachik pa le oxib’ uwach Tijob’al rech Ajchajin Tinamit. K’o kek’oji pa le Uk’u’x Tijob’al ri’ chi’ k’ut kek’oji wi e 1,200 chi achijab’ xuquje’ 630 chi ixoqib’ ri’; pa Santa Rosa, chi’ kek’oji wi e 500 chi achijab’ xuquje’ pa taq Chinab’jul e 600 chi achijab’ kek’oji chi’ xuquje’ are keyexik che pa k’isb’al taq ik’ febrero k’o jun puq chik ke’ok na ri’ pa le tijob’en ib’ ri’ e 1,700 chi ajtijoxela’ pa konojel kuk’ e 200 chi ixoqib’ ri’.

Eri retal tijoem chi ke ri k’ak’ ajtijoxelab’ ke’ok che eqa’lenelab’ rech ri PNC lajuj ik’ ri’ kanajtib’ xuquje’ we jun puq ri’ are kopa pa kajilab’al pa 4,000 eqa’lenelab’ pa konojel aretaq kuk’isb’ej ri junab’ 2017, ruk’ wari’ katerenb’ex ri b’anow tijonem rech uya’ik uchuq’ab’ ri Wokajil Ajchajin Tinamit ri’.

COMPARTIR