Eri Iximulew are jun che rok’owisaxik ri Wuqq’ij rech Ya’olchajinik pa taq Nimab’e

92

Are kakino’jisaj kichomab’al ri winaqilal chi rij taq ri k’ax kakiraqo we tijow chuq’ab’ keb’e pa taq nimab’e ri’, rumal ri’ eri Departamento rech Tránsito rech ri Wokajil Ajchajil Tinamit –PNC- are jun che rok’owisaxik ri Uk’aj uwach wuqq’ij pa Uwachulew rech ri Naciones Unidas rech ri Ya’olchajinik pa taq Nimab’e ri’.

Eri chak patan ri’ are kab’anik pa le waqxaqib’ k’a pa le kajlajuj q’ij rech mayo rech kaya’taj ri’ ri ya’oltzijol ub’i’ “Salva Vidas, Reduce la Velocidad”, are wari’ are utaqim uno’jixik kichomab’alil ri winaqilal ruk’ ri ya’ol ub’ixik ri’ xuquje’ ruk’ ri ya’b’al taq k’uttijonem rech kaya’ ub’ixik chi rij taq ri k’ax kakiraqo ri winaq che ri tijowchuq’ab’ kakib’inisaj ri kich’ich’ ri’.

Eri Comisario Otoniel Sandoval, Taqanel rech ri departamento rech tránsito rech ri PNC xuya’ ub’ixik che are wa’ tob’anik kaya’ pa le wuqq’ij rech ri Ya’olchajinik Kub’sib’al k’u’x pa taq Nimab’e ri’ rumal ri’ k’o k’iyalaj taq ya’ltzijol kab’an ri’, are rech kaya’ ub’ixik cho taq nimaq’ peraj taq ilob’alil chi rij taq nimab’e ri’, jacha’ ri rech ri Ciudad San Cristóbal, Calzada Raúl Aguilar Batres xuquje’ pa taq ri Nimab’e kab’e pa El Salvador ri’, ri B’anob’al pa taq Tijob’al ri’ chi ke ri alab’om alitom rech chi rij utz kakojik ri b’inisab’al wa’katem pa taq uk’u’x nimab’e ri’; eri tzijol ri’ kaya’taj pa taq le uwachwuj pa kemamtzij ri’ ruk’ kitob’anik ri eqa’lenelab’ rech Ajchajin pa taq Nimab’e rech Q’atb’altzij ri’ xuquje’ kech Ajetz’anelab’ rech kakiwa’lijsaj kanimaq’ ri winaq che pa jikomal b’a’ kewa’katik pa taq le nimab’e ri’ xuquje’ rech man tijowchuq’ab’ taj kewa’kat chi’ rech b’anow utzil chi ke ri winaq tinamit e aj iximulew ri’.

Xuquje’ k’o ya’olchajinik ruk’ tzukunem kab’an chi rij ub’inisaxik ri ch’ich’ kab’an ri’, rech ketaxik we man k’ot winaq kitijom tzam kakib’insaj ch’ich’ ri’ xuquje’ rech ketijoxik ri winaqilal ri’, xuquje’ ri kakib’inisaj kejach’ich’ ri’, chi’ k’u ri’ rech kajach ri Wujil rech Katijoxik ri e Ajb’insal taq ch’ich’ ri’.

“Ronojel wari’ katajin upatanixik rech k’o jun utzalaj kub’sib’al k’u’x kiwa’katem ri winaqila pa taq le nimab’e ri’ xuquje’ rech man k’ot chik ch’ich xaq tane’ kakisolkopij kib’ ri’”, xcha’ ri Sandoval.

Eri ub’ixikil rumal ri Organización Mundial rech ri Salud –OMS- eri solkopinem pa taq nimab’e kumal ch’ich’ ri’ are k’o k’iyalaj taq winaq e ukamisam b’ik ri’ ri pa 15 pa 29 kijunab’ ri’. Eri 40 pa 50% chi ke ri e ajb’insal ch’ich’ xa’rumal kik’owisam ub’insaxik ri ch’ich’ ri’.

Pa Iximulew ri’ eri solkonpin ch’ich’ pa taq nimab’e ri’ are e ajmak ri’ pa jun 33% ri e ajb’insal kejch’ich’, pa jun 20% ri e ajb’insal taq ch’ich’ ri’, pa jun 17% ri e ajb’insal ch’ich’ rech eqa’nib’al xuquje’ kumal taq ri taxistas xuquje’ pa jun 5% kumal ri kakib’inisaj ch’ich’ rech erelwinaq ri’.

Eri Doctor Oscar Barreneche, k’amal b’e rech ri Organización Panamericana rech ri Salud OPS /OMS, xuya’ ub’ixik che che ruk’ ri ya’ltzijol ri’ are rech sib’alaj kano’jixik kanima’ kichomab’alil ri winaqilal chi rij ri k’ax kuya’o we kakik’owisaj uwi’ ub’inisaxik ri ch’ich’ ri’ xuquje’ ri unimaxik ri jujun taq pixab’ rech kakiq’al kib’ rech man kakisolkopij ta chik kib’ ri’.

“Pa we jun wuqq’ij rech Ya’olchajinik Kub’sib’al k’u’x pa taq Nimab’e ri’ are ri’ jun loq’ ya’talil rech kepixb’axik ri winaqilal chi rij jun chomab’alil ri’ xuquje’ rech ruk’ jun patanixik ri’ are kataqixik ub’anik k’iyemal utzilem ri’, pa le oxmul uwach jacha’ pa le utzwachil, xuquje’ rech katanab’ax pa rajilab’al le winaq che kekamik rumal kesakataj pa taq niamb’e pa le uwachulew ri’”, xcha’ ri Barreneche.

Pa le uk’isb’alil ri jun wqq’ij rech Ya’olchajinik Kub’sib’al k’u’x pa Nimab’e ri’ eri Departamento rech Tránsito kub’an pa le jun chik q’ij domingo 14 pa le Avenida de las Américas, jun unimaq’ij chi’ ri kukoj wi jun parque vial xuquje’ kak’ut wi videos rech pixb’anik chi ke ri winaqila che ri ke’opanik ketatb’en chi’.

COMPARTIR