Rumal k’ut eri winaqil xkiya’ loq ub’ixik pa le 1577 ch’a’wb’alil antinarcótica, rech ri Ministerio rech Gobernación ruk’ ri Wokajil Ajchajil Tinamit ri’ (PNC), xb’antaj kowinem xraqatajik 671 chi pajb’al rech cocaína pa jun ch’ich’ rech eqa’nib’al ri b’insam b’ik pa le kilómetro 331, La Democracia, Chinab’jul, je ri’ utzijol xuya’ loq ri Óscar Dávila, Viceministro antinarcótico, rech Gobernación, je ri’ aretaq xk’am b’ik ri awan kunab’al ri’ pa cho kaj k’a pa le tijob’al rech ri PNC pa zona 6 pa nimatinamit ri’.

Eri pisom wi awan b’ik pa le keb’tasb’al rech pa jun ch’ich’ rech eqa’nib’al ri’, are wa’ xch’ob’ik aretaq xsiqik rumal ri tz’i’ ub’i’ Edo, ri xya’w pa k’utik ri awan kunab’al ri’.

“Eri chak tzukunik xb’an chi rij kumal ri wokajil ajchajil tinamit kuk’ ri q’atol tzij rech ri Ministerio Público, maltyox b’a’ chi ke ri winaq xkiya’ loq ub’ixik ri’, are wari’ kaq’alajinik che kikub’sim kik’u’x chi ke ri ajchajil tinamit ri’ xuquje’ katerenb’ex utzukuxik ri awan kunab’al ri’” xcha’ ri ajpatanel ri’.

Eri Dávila xub’ij che katajin na kitzukuxik ri jun molaj e ajk’ayil awan kunab’al ri’, xa’rumal k’ut chi’ pa Iximulew e k’o e wuqub’ molaj chi winaq tajin kakiq’axaj chi’ ri awan kunab’al ri’.

“Eri awan kunab’al ri’ are tajin kaq’axaxik puwi’ taq plow kumal, cho kaj kumal xuquje’ pa taq nima b’e kumal, amaq’el k’ut are tajin kakik’am b’ik ri awan kunab’al ajsik che we amaq’ tinamit ri’”, xcha’ ri uro’ viceministro antinarcótico, Óscar Dávila.

Ruk’ wari’ kutunu rib’ ri 1448 chi pajb’alil cocaína ri k’o pa jun chik ch’ich’ rech eqa’nib’al pa le kilómetro 198 rech le nima b’e Cito Zarco kok’ow pa le Finca Chicharro, rech uq’ab’tinamti ri Palmar, pa Xe’laju’, chi’ k’u ri’ eri SGAIA, ruk’ ri Mingob xuquje’ ri MP, xekowinik xkiraqo ri awan kunab’al ri’. Eri  tz’i’ eqa’lenel K-9 Laika, are xraqow rech ri’.

Xuquje’ xuya’ ub’ixik che pa enero k’a pa we kamik are raqom chik 7,797 chi pajb’alil cocaína eri rajil pa ronojel are ri’ Q.801, 082, 562. 00 ($.105, 505, 236. 28) chi pwaqil dólares.

Eri awan kunab’al ri’ are xk’am b’ik pa le k’olib’al jastaq pa le Subdirección General rech Análisis e Información Antinarcótica (SGAIA) ri’.

COMPARTIR