Eri q’atb’altzij rech Departamento rech Tránsito, xub’an jun nim sik’inik chi ke ri winaq tinamit ri’ xaq ma kikoj winaq tob’al kech che resaxik ri wujil rech b’inisal ch’ich’ ri’, xa’rumal k’ut man jun winaq tane’ kojom pa wokajil ri’ rech resaxik ri nik’aj wujilal ri’.

Are wa’ kaya’ ub’ixik rumal jun ximontzij xb’an pa q’atb’altzij chi rij resaxik ri wujil rech b’inisal ch’ich’ ri’ man k’ot pa usaqil ri uwi’ tojb’al kab’an che resaxik ri’. Rumal ri’ eri comisario General rech ri Departamento rech Tránsito, Otoniel Sandoval, xq’alajisaj ub’ixik che e resaxik ri wujil rech ya’talil kab’inisax ch’ich’ ri’ man k’ot uwi’ tojb’al kab’an chi rij ri’ xaq’ xu’ wiri’ katojik kojpa’ ri k’o pa taqanik ri’ xuquje’ man k’ot winaq tane’ keto’nik rech kakesaj tane’ ri wujilal ri’ xuquje’ man k’ot uwi’ tojb’al rech resaxik ri wujil ri’.

 “Aretaq xtotajik che k’o jun winaq xutoj Q 700 pa le resaxik ri wujil rech b’inisal ch’ich’ ri’, eri winaq ri’ k’o winaq xe’utojo che resaxik ri wujilal ri’ xuquje’ juntir wari’ k’o k’utb’al rech resaxik ri’”, xcha’.

Eri Sandoval, sib’alaj xuya’ ub’ixik che man k’ot winaq ajesal rech kakoj che resaxik ri’, eri nik’aj winaq la’ ya’tal ta pa kiq’ab’ kakesaj ri wujil ri’ xuquje’ paqal kajil kakita chi rij ri’.

Eri Departamento rech Tránsito xub’ij che ri 67 k’olib’al kab’an wi’ eta’nem ri’ rech ka’esax wi’ ri wujila ri’, are solim kumal ri q’atb’altzij rech kakilo we kanimax uwach ri’, we man kanimax ta ri’ kakitz’apij rech kesax ta chik chi’.

Xya’taj ub’ixik che pa we junab’ k’o oxib’ ub’ixik ya’om pa q’atb’altzij ri’ chi rij ri tojb’al rech man k’ot pa usaqil ri’, are wa’ ximontzij ri’ k’o chik pa uq’ab’ ri Ministerio Público (MP).

COMPARTIR