K’o 89 molaj b’anol taq k’ax xechapataj pa 2016 kanoq

308

Pa konojel e k’o 89 molaj b’anol taq k’ax ri’, xechapataj kanoq pa le 2016, kab’ixik k’o k’i uwach b’anow k’ax xkib’an ri’, jeri’ ub’ixik xya’taj kumal ri q’atb’altzij rech ri Ministerio rech Gobernación xuquje’ rumal ri Wokajil Ajchajil Tinamit (PNC), jeri’ ya’tal ub’ixik pa le rajilab’ k’o pa le wokajil ajchajil tinamit ri’.

Eri rajilab’alil ri’ kuq’alajisaj che pa ronojel e k’o 52 molaj b’anol k’ax e ajtoq’il pwaq xuquje’ e ajb’anol kamisanik xechap ri’, xuquje’ e k’o kab’lajuj molaj b’anol k’ax kakeleq’aj winaq ri’ xechapik, k’o nik’aj molaj b’anol k’ax xechapik rumal xkib’an nik’aj chik b’anow k’ax ri maj pa usaqil ri’. Eri kiq’atexik juntir nik’aj molaj b’anol k’ax ri’, are xuya’ pa retalil rech xechapatajik e 905 chi e ajb’anol k’ax ri’.

Pa ub’anikil chak xb’antaj ri’ are xuq’ansaj le kub’sib’al kik’u’x ri winaq tinamit chi ke ri Wokajil Ajchajil Tinamit ri’, rumal ri’ k’o k’i winaq xkiya’ loq ub’ixik ri k’ax xkik’ulmaj ri, are qas chi rij ri toq’inik pwaq ri rajilab’al pa ronojel pa le 2015 are 5 mil 36 ri’ e pa 2016 k’o 7 mil 34 b’anow k’ax xya’taj loq ub’ixik kumal ri winaq, are junam kub’an ri’ pa jun 40% uwi’ chik ub’ixik loq.

Eri xb’antaj uchakuxik kumal ri q’atb’altzij e k’amal b’e rech ri taqawokajnem ya’olchajinik pa amaq’ ri’, k’o ri k’aqb’alil xraqataj kumal ri xkimolo rech man xkoj ta chik pa we tinamit ri’ pa le 2016, are wari’ 4  mil 944 pa ronojel ri’, eri tzijol ri’ ok’owinaq uwach che ri xraq pa le 2015 ri are 4 mil 440 ri’.

COMPARTIR