Are rech sib’alaj kub’isam uwach ri ya’olchajinik chi ke ri winaqil e aj iximulew ri’ pa taq le uq’ijol ri Cha’onem pa Amaq’ 2019 eri Wokajil Ajchajil Tinamit katajin che unimaxik ri xtaq ub’anik ri Ministro rech Gobernación pa le Uk’u’x K’olib’al Chajinem rumal ri Dirección General rech ri Wokajil Ajchajil Tinamit (DGPNC) rech amaq’el katerenb’exik ronojel ya’olchajinem kab’an pa taq le Comisarías rech pa we amaq’ ri’.

Are ri Comando jun k’olib’alil rech ya’olchajinem che ri k’o wi ronojel taq chakub’al chokonsab’al rech no’jb’anikil xuquje’ rech ub’eyal uch’ob’ik rilik ri ya’olchajinik chi ke konojel ri winaqil e aj iximulew ri’, xcha’ ri ajtzijolinel rech ajchajil tinamit, Pablo Castillo.

Chi’ k’u ri’, xuya’o pa k’utik ri rachib’al xuquje’ ri no’jchakub’al che ri kuk’ut ropanb’alil che ri keraqataj wi jujun chi ke e ajchajil tinamit ri’ rech ke’ilik wexa’ k’o tob’anem pa aninaqil karaj chi ke ri’ rech kesik’ix loq we jeri’ rajawaxik kopanik ri PNC ri’.

“Ruk’ wa’ k’o jun tob’ab’al qech rech kaqesaj rachib’al che ri qas keraqataj wi’ ruk’ ri no’jchakub’al ub’i’ Argis, are ri’ jun software ri are kuya’o pa retal rech kilik we e k’o winaq, ch’ich’ xuquje’ xik’ch’ich’ e chapom ri’, pa we juntir amaq’ tinamit”, xcha’ ri Castillo.

Eri jun chik uchuq’ab’ ri Centro rech Comando ri’ are ri coordinación interinstitucional tajin uya’ik che ruk’ katob’anik ri Tribunal Supremo Electoral, ri Wokajil Ajchajil Amaq’ rech Iximulew, ri Nima Q’atb’altzij rech ri Loq’ Ya’talil Winaqil xuquje’ rumal ri Ministerio Público, rech wexa’ k’o jun k’ax kak’ulmataj kaya’ loq ub’ixik pa taq k’olib’al cha’onik ri’, are ri’ ya’talil rech chinaq kraj kuya’ loq ub’ixik, chakib’ij b’a’ loq xuquje’ are upatan ri’ ri wokajil ajchajil tinamit rech kuchomaj ri’, xcha’ rajtzijolinel ri’.