Eri nimab’e xq’atexik sib’alaj utz xb’antaj ri’ pa le kiq’atexik ri ajk’ayin awan kunb’alil ri’

153

K’o keb’ nima’q q’atenik xb’an chi ke ri e ajk’ayin awan kunb’alil xb’antaj pa taq le k’isb’al q’ij ri’ aretaq xraqatajik 941 chi pajb’alil rech cocaína chi’ uchi’ saqplow ri’.

Eri Viceministro Antinarcótico, Oscar Dávila Mejicanos, xuya’ ub’ixik che we kamik are raqom chik 9 mil 332.23 pajb’al rech cocaína, are uwach ri tzukunem xb’an pa le kiq’atexik ri e ajk’ayin awan kunb’alil ri’.

Pane’ b’a’ pa le junab’ 2016 eri rajilab’al xraqataj ri’ are xopan pa 10 mil 232.17 upajb’alil awan kunb’alil che pa unimal ri xraqataj ri’ pa taq le ya’olchajinik xb’an pa we amaq’ ri’.

Eri Viceministro Dávila xub’ij eri ya’olchajinik ri’ are xb’antajik rumal k’o utzijol xya’taj loq ub’ixik pa oxxukut ub’antajil rumal Iximulew ruk’ Estados Unidos ri’, Colombia xuquje’ Ecuador, rumal ri rajilab’al pa le 2017 kab’ixik are kaq’an ri’ rumal ri tiko’n rech cocaína katajin pa Sur América, ri k’o pa uk’iyib’al pa 40 pa 41% ri’, rumal ri’ are kuq’ansaj rajilb’al uraqik ri awan kunb’alil ri’ pa we amaq’.

Pa le Quinto Viceministerio rech Gobernación ruk’ ub’anikil jun tzijol ri’ pa juntir are xub’an che rech xkok we cholchak rech ya’olchajinik pa k’ulb’a’t juyub’ pa taq amaq’ib’ ri’.

Pa taq nimab’e ri’ are k’o jun nimalaj ya’olchajinik xb’antaj kumal ri Fuerza rech Tarea Intersintitucionales, ub’i’ “Plan Fortaleza”, chi’ k’u ri’ sib’alaj xechajin wi ri Fuerzas rech Tarea Chortí xuquje’ Tecúm Umán xuquje’ jeri’ pa le ukab’ cholchak rech ri Fuerza rech Tarea Xinca che ri katajin uterenb’exik ruk’ q’atenik katajin pa taq k’ulb’a’t juyub’ pa amaq’il ri’.

“Rumal le jun ub’eyal ya’olchajinik ri’ kumal ri Fuerza rech Tarea xojkowin ri’ che ub’anik ri q’aten nimab’e cho taq k’ulb’a’t juyub’ pa amaq’il ri’ xuquje’ chi’ k’u ri’ eri q’atb’altzij pa amaq’el xechajin ri’ pa taq k’ulb’a’t juyub’ ruk’ Honduras, El Salvador xuquje’ México”, xcha’ ri Dávila.

Aretaq xeta’maxik che ri awan kunab’alil che xraqataj ri’ we kamik are qas xraqataj ri’ pa le ya’olchajinik xb’an pa  uwi’ plow, rumal ri’ xkoj ri ya’olchajinik ub’i’ Plan Fortaleza Noroccidental rech uq’atexik pa taq k’ulb’a’t juyub’ pa amaq’il ri’ ruk’ México ri’.

We jun cholchak che ri xkoj ri’ are xa’rumal sib’alaj rajawaxik xq’atexik ri awan kunb’alil che tajin oksam loq pa uwi’ plow rumal xya’taj pa utzijol ri’ che chi’ tajin kak’ow b’ik ri’ rech kataq paqalik an che ri México ri’ rumal che ri tajin uq’atexik chi uchi’ plow ri’.

“Eri e ajk’ayin kunb’alil ri’ are katajin ri’ che jun nim q’atenik chi ke ri’ xuquje’ are sib’alaj utz ri’, rumal ri’ katajin ri q’atenik chi ke pa uk’ak’ taq kib’e nimab’e ri’ xuquje’ are qas utz kakilo rech kakiq’axaj pa we amaq’ Iximulew ri’”, xcha’ ri Dávila.

COMPARTIR