Eri Nimatinamit centroamericanos tajin kakitzijoj le kik’aslemam chi rij uq’atexik ri maras ri’

388

Are rech b’a’ keq’atexik ri maras, pandillas xuquje’ k’aqb’alil maj pa usaqil pa taq le rulewal ri’, eri q’atb’altzij rech ri Ministerio rech Gobernación, ri Instituto rech Tijob’enik rech Uk’iyemalil ri’ (IEPADES) ruk’ utob’anik ri Embajada rech Suecia, xkib’an ri Foro ub’i’ “Le Alab’om alitom, le Q’apojib’ xuquje’ ri K’aqb’alil pa le Triángulo Norte rech Centroamérica”.

Pa le foro ri’ xtatb’en ri viceministro rech Q’atel k’ax, Axel Romero, jeri’ ri Carmen Rosa de León Escribano rech IEPADES xuquje’ ri e ajtaqom e ajno’jchakunelab’ rech El Salvador xuquje’ Honduras.

We ilb’anik chomanem ri’ are utaqim pa taq le jachakunb’al rech ri Wokajil Ajchajil Tinamit rech kaketa’maj ub’anikil uwach pa taq le tinamit rech Honduras xuquje’ El Salvador pa le kiq’atexik kib’anom chi ke ri maras ruk ri k’aqb’alil ri’.

Eri Axel Romero viceministro rech Q’atenik k’ax, eri q’apojib’ alab’om alitom ki’okik kuk’ taq ri molajil b’anol k’ax are rumal ri’ man ya’tal ta kichak kipatan pa we amaq’ ri’.

“Je wari’ kakib’an ri’ rech kakilo jas kape wi kiwa kirajil rumal jeri’ kakib’an che kib’ ri’, rumal maj tijonem chi ke, rumal maj kitat kinan ke’ilow kech, rumal maj ub’anikil pixb’anik chi ke xuquje’ rumal man k’ot kachalal ke’ilow ri’”, xcha’ ri taqawokajnel ri’.

Xkub’isaj ub’ixik che pa jun 80 por ciento che juntir ri k’ax b’anom ri’ are ruk’ k’aqb’al ri’.

Eri José Miguel Cruz rech ri Nimatijob’al Internacional rech Florida, xuya’ ub’ixik che ri q’apojib’ alab’om alitom rech El Salvador are tajin kikaj kakesaj kib’ kuk’ ri pandillas, rumal b’a’ qas e taqal na xe’ok kuk’ ri’.

Eri Carmen Rosa de León, xuya’ ub’ixik che are kach’ob’ na kachomax na jas ri ub’anik ub’anom ri Honduras xuquje’ ri El Salvador pa ri keq’atexik ri nik’aj molaj b’anol k’ax xuquje’ ri ‘ k’aqb’alil ri’, rech kakoj na uwi uchuq’ab’ ya’olchajinik pa we amaq’ ri’.

Eri uwachtzijonem xchomaxik ri’ are chi rij ri k’ak’ uwach ri nik’aj molaj b’anol k’ax, ri k’aqb’alil xuquje’ ri pandillas; xuquje’ are wa’ ub’anikil Ub’eyal le katajin uch’ob’ik pa le q’aten k’ax ri’.