Nikpa’ kub’an pa taq ronojel junab’ k’o xetaq loq pa le nab’e taq kab’enam waqib’ mul ri xik’ach’ich aretaq xetaq loq ri xechap loq kapetik pa Houston Texas, Estados Unidos. E rajchak ri jujun taq puqwiqom tzij ri’, e are kek’amow panoq chisaq che ri rachoch ri k’amow ub’e ri Migración ri’ le k’o pa le Fuerza Aérea Guatemalteca e are ri’ keno’jix ri’, xuquje’ rech kaya’ kichuq’ab’ pa kanima’ ri’, xuquje’ rech kajit kachak rech kechakunik.

“E chisaq che ri k’olib’al kek’ul wiri are rech k’o tob’anik ya’tal chi ke kumal ri puqwiqom tzij ri’ xuquje’ eri wokajtzij ri’ are kuya’o jujun uwach ilonik chi ke ri qawinaq che ri k’a te ke’opan chi’ k’o ch’a’wib’al kaya’ chi ke rech kech’a’w kuk’ taq kachalal ri’, xuquje’ rech katzijox chi ke le ch’ich’ kepe wiri xuquje’ jas ke ke’pon wiri rech keb’e chupam ri’”, xcha’ ri Alejandra Mena, Ajtzijolinel rech ri Dirección General de Migración (DGM) ri’.

 

Xub’ij ri’ che ri chomantzij chi rij le ya’b’al chak patan kumal we puqwiqom tzij ri’ e are kakiya’o ub’ixik jawchi’ k’o wiri rech ke’opan le winaq kakitzijob’ej xuquje’ rech kekowin ke’ok chik pa le ub’anikil ujikomal pa kasaqilal le winaqilal ri’.

Rumal ri’, eri chak taqkil ya’tal chi ke kumal ri puqwiqom tzij are rech kaya’ kachuq’ab’ rech no’jimal kakiwa’lijsaj kib’ ri’, k’o nik’aj kek’ixik, k’o nik’aj chik xa’ kakixe’j kib’, xuquje’ nik’aj majun taq karajil k’o ri’ rumal ri’ q’alaj che kuwach keb’isonik rumal k’ut sib’alaj kakitzukuj jas kakiraj wi kirajil rech keb’e pa taq kajuyub’ katinamit ri’ rumal k’ut juntir kajastaq xsach kuk’ ri’ xuquje’ rumal k’o nima’q taq k’asaj chi kij ri’ rumal are xkikoj pa le kab’enam xb’e wi pa le juyub’ tinamit americano ri’.

Xub’ij chik che xb’antaj k’i taq ik’ ri’ eri winaq che ri xechap xetaq loq ri’ emu wari’ e are ketaq loq pa taq le xik’ach’ich kepe pa taq le amaq’il rech ri Unión Americana ri’, e are ri’ k’o nim tzijob’enik kaya’ chi ke ri’ kumal rajchak ri Dirección General rech Migración, rumal k’ut e k’i chi ke keta’m taj jas ub’anik rech ke’ok loq pa we amaq’ ri’.

 

 

COMPARTIR