K’o xechapatajik rumal k’o jun xkikamisaj pa jun rachoch e ajkojonelab’

84

 

K’o juk’ulaj winaq ruk’ jun q’apoj ali xechapatajik rech te k’u ri’ xek’am b’ik pa q’atb’altzij ri’ kumal reqa’lenelab’ rech ri Wokajil Ajchajil Tinamit (PNC) aretaq te’et xeraqatajik pa jun ja k’olib’al ri kojom che rachoch jun iglesia evangélica chi’ k’u ri’ xraqataj wi’ jun winaq kaminaq chik.

Eri xk’ulmataj ri’ pa le 28 avenida A, rech ri colonia Villa Hermosa I, San Miguel Petapa, chi k’u ri’ xb’antaj kowinem xchapataj wi’ a Hugo Rolando Coro, 29 ujunab’, kab’ixik xq’alajinik che k’o jun elaq’ ub’anom ri’ pa le junab’ 2009; xuquje’ ri Ana Judith Ruiz Reyes, 23 ujunab’ xuquje’ ruk’ jun q’apoj ali 15 ujunab’ ri’.

Eri xechapatajik ri’

Xmajtaj kichapik kumal e ajchajil tinamit aretaq xetajin che ya’olchajinik winaqilal chi’, aretaq xe’opan pa le ja k’olib’al ri’ k’a te xkito kuraq uchi’ jun winaq pa le ja k’olib’al ri’, xuquje’ eri winaq chi rij panqo xkiya’ ub’ixik che chi’ k’o kamisan winaq katajin ri’.

Pa aninaqil ri’ eri e ajchajil tinamit xkitor ri uchi’ ja ri’ chi’ k’u ri’ xkiraq wi’ jun winaq kamisam chik ri k’o pa jun tonel xar rij pisom pa jun atzi’yaq ri’.

Xuquje’ chi’ xeraqataj wi’ ri e oxib’ winaq xechapataj ri’. Xuquje’ chi’ xraqataj wi’ jun moto taxi saq kaq rij eri uplaka are M-586CCG, rumal ri’ xtaq kimolik ri nik’aj chik e ajchajil tinamit chi’ rech xkichomaj rij ri’.

Xuquje’ chi rij ri b’anow k’ax ri’ eri winaq xechapik e are k’ut xeraqataj pa le ja k’olib’al ri’ rumal ri’ xetaqik pa q’atb’altzij ri’.