K’o ya’olchajinik kb’an ri’ rech uq’atexik kaka’yix ri che’ k’isis ri’

83

Pa komonchak ub’anik ruk’ ri Ministro rech Gobernación, Francisco Rivas Lara xuquje’ ruk’ ri ri K’amal b’e rech ri Wokajil Ajchajil Tinamit xuquje’ kuk’ juntir ri q’atb’altzij rech e ajchajil tinamit ri’, xya’taj pa le umajik ri cholchak pa jo’ob’ rajilab’al 5 – 2017, are rech ya’olchajinik rech kaq’atexik uk’ayixik ri K’isis ri maj pa usaqil ri’ (Abies guatemalensis) xuquje’ are rech kuwa’lijsax ula’wchixik rech kasach taj xuquje’ rech kato’ uwach pa juntir amaq’ tinamit ri’, xcha’ ri Comisario Elías Rodríguez, Taqanel rech ri División xuquje’  Protección rech ri Kajulew ri’ (DIPRONA) ri’.

“Are wari’ xkojik rumal k’ut tajin upetik ri nimaq’ij pa taq k’isb’al junab’ ri’ aretaq kak’ayix we jun che’ ri’ che no’jimal katajin usachik uwach ri’, ronojel ri ya’olchajinik ri’ katajin pa nimab’e kab’e Saqplow ri’, jeri’ pa nimab’e rech Interamericana rumal k’ut qas chi’ kok’owisax wi ri che’ ri’ xuquje’ jeri’ pa nimab’e rech Q’anaplow ri’”.

Xuquje’ xuya’ ub’ixik che ri ya’olchajinik ri’ are kuya’ uchuq’ab’ kchak patan ri 400 eqa’lenelab’ e ajno’jinelab’ rech DIPRONA pa taq le tinamit rech Chinab’jul, San Marcos, Quiché, Chuiw’meq’ina,  Tz’oloja’, Chimaltenango  xuquje’ pa uk’u’x nimatinamit, pa Centra Sur, pa Centro Universitario Metropolitano, rumal k’ut pa le uq’ijol ri’ pa jujun taq junab’ k’o che’ jewa’ kak’ayix pa Nimaq’ij Paxkuwa’ xuquje’ k’o nik’aj k’ay kab’an ri’ che ri ya’tal kak’ayixik.

Rumal ri’ eri Fiscal Auxiliar rech Q’atow tzij chi rij b’anow k’ax che ri uwachulew ri’, rech ri Ministerio Público xuya’ ub’ixik che pa le junab’ 2016 k’o k’iyalaj awan k’ayin che’ ri’ xraqataj ri’ pa taq Xe’laju’, San Marcos, pa Uk’ux’ Nimatinamit Iximulew ri’, Chimaltenango Costa Sur xuquje’ pa Sacatepéquez ruk’ pa ronojel 646 mil uq’ab’ ri pinabete ri’ le rajil pa ronojel are ri’ 3.3 millones chi pwaqil rech pa Iximulew ri’.

Are ya’tal kaloq’ik ri k’o saq umarchamo ri’

Eri rajawtzij rech ri Instituto Nacional rech Bosques INAB, Rony Granados, xuya’ ub’ixik che pa le ub’anikil ri Ub’eyal Uchomaxik pa Tinamit rech Kala’wchix uwach ri K’isis ri’, are xtoq’axik utixik pa utzilal ri’ uwach ruk’ ub’anikil uchakuxik kumal e ajno’jtikonel rech che ri katikom pa juntir ri’ 110 mil raqan che k’isis ruk’ 15 mil chi che’ chik pa taq sataj uk’olib’alil.

“Pa le uq’ij ri paxkuwa’ 2017, e k’o e kojom chuxo’l taq che’ ri’, kojom pa taq le korona xuquje’ pa le chiyil ri’ e pa ronojel uwach ri’ k’o 41 mil uwach taq kak’ayixik xuquje’ are taqom uk’ayixik pa taq Nimak’ayib’al Je’al jastaq ri’ xuquje’ jeri’ kak’ayixik pa taq nimak’ayib’al ri’, ronojel wa’ k’o saq umarchamo kojom ri’ rech q’alaj che k’o pa usaqil kak’ayix ri’, rumal ri’ kaqab’ij chi ke konojel ri winaq e aj iximulew qas kilo b’a’ we k’o ri retal kojom rech te k’u ri’ k’o pa usaqil kakiloq’o”, xcha’ ri Granados.

COMPARTIR