Pa Santa María Visitación pa tinamit ri’ majun b’anow k’ax kamisanik b’anom ri’ pa lajuj junab’ chik

247

Pa Santa María Visitación, k’o pa Tz’oloja’ ri’, are jun uq’ab’tinamit korlim rij che je’lalil taq uwi’ juyub’ utz uka’yib’alil ri’, pane’ b’a’ xk’ulmataj chi’ ri jun b’anow k’ax pa taq le junab’ kanoq, we kamik ri’ pa joremal kek’aslemam le uwinaqil chi’, k’o nim ki’kotem kakina’o rumal eri b’anow k’ax ri’ xel kanoq ri’, pa lajuj junab’ chik ri’ majun chik b’anow k’ax b’anom chi’.

Pa le juyub’ tinamit ri’ e k’o e 3 mil 500 uwinaqil ri’, konojel k’ut keta’m kuwach chi’, keta’m kechakunik pa komonb’al kuk’ ri q’atb’altzij chi’, k’o jun nim tzijob’enik chi kuwach ruk’ ri Wokajil Ajchajil Tinamti ri’ xuquje’ ri e are sib’alaj kakinimaj uwach kiwach ri e wuqub’ eqa’lenel ri’, ri e k’o kuk’ pa tinamit ri’, ri tajin ketob’an che ub’anik utzalaj b’anow ya’olchajinik chi’.

Eri subinspector Edgar Cholotío, xub’ij che pa Santa María Visitación ri’ eri winaq chi’ sib’alaj e pixb’am ri’, chi’ k’ut e junam ta kuk’ nik’aj chik winaq tinamit che ri sib’alaj e b’anol ch’oj ri’ pa Iximulew, eri winaqil chi’ keta’m kchak patan ri e ajchajil tinamit ri’ xuquje’ keki’kotik kuk’ le eqa’lenelab’ chi’, eri kakib’ano e are jun ketob’an kuk’ pa le chak patan rech q’atel b’anow k’ax chi’ kumal ri Wokajil Ajchajil Tinamit (PNC).

“Eri chak rech q’atel b’anow k’ax ri’, are tajin katob’anik che uya’ik joremal jikomal pa kak’aslemal le winaq tinamit chi’, are wa’ xmajtaj loq pa le 2006 xuquje’ are k’o na ri’ chi’, we utz ri chak patan kab’an chi’ are k’o jun nimalaj utzilem naj kak’oji chi’. Chuxo’l taq ri cholchak katajin chi’ are ri’: le rech Policía tu Amigo, le rech  Resistencia rech maj utijik awan kunb’alil xuquje’ rech maj b’anow k’ax ri’, ri rech Educación rech Kq’atexik ri Pandillas (GREAT), jeri’ ruk’ nik’aj chik utz b’anow ri’”, xcha’.

Eri pa utzilem kech’a’wik xuquje’ ri chak ri’ kacha’ ri Cholotío, are kuk’utu che k’o jun nim pixb’anem katajin uya’ik chi ke taq ak’alab’ che ri utz kakil kchak patan ri ajchajil tinamit chi’, rumal ri’ kech’a’w kuk’ kakiya’o rutzil kuwach kakib’ij kib’i’ chi ke aretaq ke’ok pa tijob’al ri’, rech kepixb’axik rech ketzijob’exik jeri’ we keb’in pa taq b’e uxo’l ja pa tinamit ri’. Tajin b’a’ kakik’aslemaj kino’jb’alil xuquje’ ri kuta’n chi ke kumal kinan tat ri’ jeri’ kakib’an chi ke ri q’atb’altzij aretaq kech’a’w kuk’ ri’.

Pa no’jimal katajin le chak ri’

Eri ub’anikil tzijob’enik chi kuwach ri PNC kuk’ ri winaqil tinamit ri’, man je tari’ xub’an ri’, eri Lucía Chavajay, aj nim nan pa tinamit ri’, xuna’tisaj che aretaq xk’ub’ kuk’u’x chi ke ri wokajil ajchajil tinamit, pa no’jimal ri’ xuquje’ k’o jun nim k’amow ub’anik utzil chi ke ri eqa’lenel ri’, rumal b’a’ ri k’ax xutij ri Santa María Visitación pa le jun b’anow k’ax xb’an kanoq ojer tzij chi’ pa tinamit ri’.

“We kamik eri xib’alil ri’ are xok relik qumal chi rij ri k’ax xb’antaj kanoq pa taq le junab’ pa taq le rech ochenta, pa jub’ik pa no’jimal ri’ xkub’ chik qak’u’x chi ke ri e ajchajil tinamit ri’, rumal ri k’ax xqil kanoq ojer, eri uj kaqachomaj che k’o jun chik jun utzalaj anima’ che ub’anik utzilem ri’, kumal ri ajchajil tiamit chi’ chi ke ri winaqil ri’, rumal ketob’an chik chi ke ri ri’j winaq xuquje’ pa amaq’el rajawaxik jewa’ kakib’an ri’”, xcha’ ri Chavajay.

Eri aj concejal cuarto, Ana Dionisio, xuya’ ub’ixik ucholaj che ri b’anow tijonem chi’ xuquje’ rumal xemol le winaq ri’ are wa’ qas xuya’ jun utzalaj utak’alib’al le tinamit chi’, rumal k’ut pa Santa María Visitación ri’ qonojel k’ut keta’m kaqasik’ij kaqatz’ib’aj wawuj ri’, eri taq ak’alab’ xuquje’ ri e q’apoj alab’om alitom tajin kakitijoj kib’ xuquje’ konojel le ri’j winaq k’o jun katijob’al kesam ri’. Chi’ e k’o e jo’ob’ COCODES, e k’o Consejos Comunitarios rech Uk’iyemal tinamit ri’, k’o jun Molaj Ajpatanib’ chi’ rech kakina’taj pa amaq’el ri uno’jk’aslemal winaq tinamit chi’ xuquje’ rech man kasach taj kib’antajil ri’, k’o jun Alcaldía Auxiliar xuquje’ k’o jun Comisión rech Q’atel b’anow k’ax ub’i’ COMUPRE.

“Eri qaxe’il ojer k’o jun utzalaj tijob’enik xkib’ano, are wa’ xuya’ jun utzalaj uwa’lib’al qak’aslemalil rech kajk’oji pa joremal jikomal ri’, pa nimab’al ib’ xuquje’ pa ki’kotemal quk’ qonojel, are wa’ uwach ri qilob’alil uj maya’ winaq rumal ri’ ronojel qanima’ kaqilo ri kajulew xuquje’ rumal ri’ kaqaloq’oq’ej ri qawinaq ri’, eri qatiko’n k’o jun utzalaj utz’aqatil uk’aslemal qumal, ruk’ loq’oq’em kojtijon uj xuquje’ qeta’m che k’o ri loq’ ya’talil chaqe xuquje’ k’o ri ya’talik kaqanimaj uwach xuquje’ rumal ri’ majun b’anow k’ax quk’ ri’”.

Eri Santa María Visitación pa lajuj junab’ kanoq

Eri k’isb’al b’anow k’ax kamisanik xb’an kanoq pa Santa María Visitación are xk’ulmataj kanoq pa 2008, are chi’ xb’antaj jun ch’ojinik kumal nik’aj e q’ab’arel winaq, rumal ri’ k’o jun kaminaq xel kanoq chinaqaj ri tijob’al chi’, are wa’ xuya’ uchuq’ab’ ub’anik jun utzalaj komon winaqil rech chomanik ri’ xuquje’ rech xk’oji jun utzalaj tzijob’enik chi kuwach ri winaq chi’, jeri’ kuk’ ri q’atb’altzij xuquje’ kuk’ ri e ajchajil tinamit ri’, rumal ri’ junwi’ xkina’ ri’, jeri’ xutzijoj ri Catalino Teleguario, k’amal b’e rech ri COMUPRE.

“Pa lajuj junab’ chik ok’owinaq jun b’anow k’ax chi’, chi’ sib’alaj k’o joremal pa amaq’el ri’, kana’taj chuwe che e k’o winaq kepe pa nimatinamit xuquje’ pa taq nik’aj chik uq’ab’tinamit chi rij panoq rech xakikojo b’anow k’ax chi’, emu wari’ xeqaq’atij kuwach rumal xepe che b’anow taq elaq’, k’o atz’iyaq xkeleq’aj ri’, k’o ek’, k’o k’i taq b’anow elaq’ xkib’an ri’ xuquje’ juntir wari’ xaqaq’atij ub’anik pa tinamit ri’”, xcha’.

Eri Teleguario, xuya’ ub’ixik che ri Komon rech Q’atel b’anow k’ax ri’ are uk’am ub’e, xuquje’ ri e ajchajil tinamit, e k’o achijab’ ixoqib’ kakik’ex kib’ che b’anow chajinik pa taq chaq’ab’ kuk’ ri PNC, keta’m k’ut che sib’alaj rajawaxik uq’atexik ri b’anow k’ax chi’, we kamik ri’ e are chik ri eqa’lenel kechajin chi’.

Pa kawokajil ri e achalal ri’

Eri Herbert  Pérez, eri k’amal b’e rech ri COCODE, xub’ij che ri winaq chi’ sib’alaj kakinimaj kib’ kakiloq’oq’ej kib’ eri uwach k’o chi kuwach are le b’anow tijionem pa Santa María Visitación ri’, are wa’ jun nimtijow chuq’ab’chak pa naj junab’ sib’alaj katajin chi’, xuquje’ eri komon e ajch’ab’al xuquje’ k’o jun nim uchuq’ab’ ukojom chi’ xuquje’ ruk’ le b’anow taq utz tijb’enik pa taq le tijob’al we kamik jacha’ utob’anik ri tijob’al kib’i’ lasallista, ri pa amaq’el sib’alaj ketajin che ya’oltob’anik ri’ e are jun kinan tat katijoj ri kalk’uwal ri’, jacha’ kab’antaj pa taq junab’il ri’.

“K’a pa taq le achochib’al kumal le winaq e achalalil eri no’jk’aslemal ri’ xuquje’ we are kaqaj majun chik ajb’anol k’ax kak’oji chi’ chuwe’q kab’ij cheqatijoj b’a’ ri qalk’uwal k’a keya’ pa katyoxij ri’”, xcha’.

Pa we tinamit ri’ eri jun ja winaqil e achalal sib’alaj k’o jun kpatan ri’ aretaq wexa’ k’o keb’e chi ken aj, are wari’ eri nan tat naj ta kenajtib’ ri’ rumal k’ut ketzalij chi loq pa tinamit rech kakilo ri kalk’uwal kek’iyar ri’ xuquje’ man kakiya ta kanoq ri kixoqil kuk’ ri kalk’uwal ri’, jacha’ xub’an ri Ricardo Chavaloc, ri are ri’ xb’e pa Estados Unidos, aretaq xtz’aqat jun ujunab’ ri ralk’uwal xuchomaj xtzalij loq.

“Are k’o upatan ri’ we jun are e k’o ralk’uwal ri’ rech kak’oji kuk’ rech kuk’am kib’e kuk’ut kib’e, rech kakilo le utz kaqab’an quk’, rech katukel taj keb’el kanoq. Rumal ri’ eri in in ajjosolche’ are wa’ nuchak patan le tajin kink’ut che ri walk’ulwal ri’, rumal are kuwaj kinlinya’o jun utz winaq rech b’anol utzilem ri’, rech man kub’an ta b’anow k’ax ri’”.

Eri Emma Chavajay, k’o 20 ujunab’ xuquje’ we kamik kutijoj rib’ che Administración rech Empresas, k’o k’i na’tib’alil k’o pa ranima’ uchomab’al rech pa uch’ite’nal xuquje’ rech pa uq’apojil ri’, are wa’ xub’an che rumal sib’alaj xloq’oxik rumal unan tat xuquje’ xk’iy pa joremal uk’olib’em ri’, man kub’an ta chik ki’eb uk’u’x che kilik nik’aj pandillas xuquje’ chi ke ri e b’anol k’ax ri’.

Are wa’ k’o retal b’anow xuya’ pa le uchak patan ri’, are jun chi ke rech xumaj utijoxik rib’ pa le nimatijob’al, rech kuterenb’ex uwa’lijsaxik utz taq no’jk’alemal ri’ xuquje’ rech kanimaxik kuwach uwinaq pa utinamit ri’, man xaq ta kuk’ ri e k’o panoq, jeri’ ruk’ juntir pa le ub’antajil ri’, rech kub’an jun utzalaj b’anikil pa Iximulew ri’.