Ruk’ wa’ are taqim kumal ri q’atb’altzij rech ri Ministerio rech Gobernación pa komonchak ruk’ ri Ministerio Público (MP) xuquje’ ruk’ ri Wokajil Ajchajil Tinamit (PNC) sib’alaj katajin jun nimalaj b’anow tzukunem rech ub’anik 161 b’anow tzukunik ri’ rech ketzukuxik kechapik e 70 ri’j taq winaq kuk’ e 15 e ak’alab’ e uwinaq ri pandilla rech ri Barrio 18, ri kakib’an toq’inik pwaq chi ke winaq ri’.

Ruk’ ri b’anow tzukunik ri’ xuquje’ are taqim kesik’ixik pa q’atb’altzij e 101 chi winaqil ri’ rech pa nab’e mul kechomax pa q’atoj tzij nik’aj winaq e tz’apil pache’ ri kab’ixik e uwinaq jun molaj b’anol k’ax che ri tajin kakixib’ij xuquje’ xaq katajinik kikaj kakikamisaj winaq rech e oxib’ taq wokajil chak rech ch’ich’ e erelwinaq ri xek’amow b’ik pa q’atb’altzij ri’ rumal ri k’ax tajin kakib’an chi ke ri’.

Eri q’atb’altzij rech ajchajil tinamit xkib’ij che ri b’anow tzukunem ri’ are pa junamil ub’anik xb’an ri’ pa komonchak ruk’ ri Ministerio Público pa taq le rulewal tinamit rech Iximulew, Santa Rosa, Sacatepéquez, Escuintla, B’oko’ (Chimaltenango), Jalapa xuquje’ Suchitepéquez ri’.

Eri b’anow tzukno’jchak ri’ chi ke ri b’anol k’ax ri’ eri winaq che xkitoq’ij pwaq chi ke le pwaq ri’ are xkikoj pa taq pwaqb’al ja ri’ pa ronojel taq k’isb’al wuqq’ij, jeri’ pa nik’aj taq ik’ xuquje’ chi ik’ taq.

Eri b’anow tzukno’jchak ri’ are xnajtib’ keb’ junab’ ri’ xuquje’ chi’ k’u ri’ xch’ob’otajik che nik’aj molaj b’anol k’ax ri’ pa ronojel xkimol ri’ Q.6 millones 551 mil 700, chi pwaqil are xkitoq’ij chi ke winaq ri’.

Pa taq rulewal ri tinamit rech Iximulew chi’ k’u ri’ xeb’antaj wi’ k’iyalaj taq tzukunjik pa ronojel ri’ k’o 146 ri’ xuquje’ jeri’ xb’an pa taq nik’aj chik rulewal tinamit rech Chinautla, San Juan Sacatepéquez, pa Uk’u’x Iximulew, pa Mixco, Villa Nueva, Amatitlán, San Miguel Petapa, Villa Canales, San José Pinula xuquje’ pa Santa Catarina Pinula ri’.