Xchapataj jun b’anol k’ax che ri xreleq’aj jun ala pa Alta Verapaz

263

Eri Ministerio rech Gobernación k’o jun q’atenik tajin kub’an chi ke ri molaj b’anol k’ax ri’, rumal ri’ eri Comando Antisecuestros rech ri  Wokajil Ajchajil Tinamit, xekowin k’ut xkiraqo xuquje’ xkichapo ri jun b’anol k’ax ub’i’ César Augusto Cruz Teyul, pa le tinamit rech San Juan Chamelco Alta Verapaz, eri umak kab’ixik are xa’rumal xreleq’aj jun ala ri’.

Eri b’anow tzukunem chi rij jun b’anow k’ax ri’ are xuya’ pa saq rech xch’ob’ik che ri Cruz Teyul, are xuk’am b’ik xreleq’aj ri’ jun ala 12 ujunab’, aretaq b’enal pa jun tijob’al chi la’. Eri jun b’anow k’ax ri’ are xk’ulmatajik pa le 26 rech febrero rech 201, pa jun k’olib’em pa tinamit rech San Juan Chalmelco, xuquje’ chi rij jun alaj ala ri’ are tajin xutoq’ij Q.400 mil chi pwaqil ri’.

Eri q’atb’altzij rech ajchajil tinamit xuya’ utzijol che ri tinamit xk’ub’ kik’u’x chi ke ri wokajil ajchajil tinamit rumal xekowin che uchapik jun achi’ b’anol k’ax ri’, are wa’ xb’antajik rumal eri rachalal le jun alaj ala xkiya’o ub’ixik chi ke ri q’atb’altzij ri’.

Rumal ri’ eri ajno’jinelab’ rech ri Comando antisecuestros e are xkino’jij ri rachalal ri alaj ala che xeleq’axik rech xetzijon ruk’ pa jun chik q’ij ri jun achi’ b’anol k’ax ri’, rech xkib’ij che are kakitojo chi rij Q.30 mil.

Eri utzijolil ri’

Eri wokajil ajchajil tinamit xkichap ri jun achi b’anol k’ax pa le 1 rech marzo rech 2014 pa jun ja k’olib’al rech Cobán, ri a Ricardo Caal Sub, Ronaldo Marco Tulio Tupil Coy xuquje’ a Pablo Botzoc May, e are kab’ixik xkeleq’aj le jun ala ala ri’.

Eri q’atb’altzij rech ajchajil tinamit ruk’ ri tzukunem xkiterne’j rij ri’ rech xekowinik xkich’ob’o che pa le jun b’anow k’ax ri’ are jun ri jun achi’ ub’i’ Cruz Teyul, rumal are rachalal ri jun alaj ala ri’.

Rumal ri’ eri q’atb’altzij rech Alta Verapaz xutaq ri uchapik ri’ pa le 27 rech febrero rech 2,018.