Xchapataj jun kamisanel xuquje’ ajtoq’il pwaq rech ri “ms” pa Chimaltenango ri’

249

Are wa’ xb’antaj k’ut pa le uterenb’exik ri b’anow tzukno’jchak che ri b’anom ri’ chi rij taq utzijol kumal ri ajtzukno’jchak e ajchajil tinamit ri’, pa nimaq’ab’ rech pa martes ri’ k’o jun b’anol k’ax kamisanel uwinaq ri mara salvatrucha, xchap ri’, kab’ixik are jun chi kamisanel rech ri clica “locos centrales salvatrucha”; are molaj b’anol k’ax sib’ala k’ax katajin che ub’anik pa tinamit rech Chimaltenango.

Eri xchapataj ri’ are a Edvin Leonel Rodríguez Jarquín, 30 ujunab’, ri kab’ixik xchapik qas pa uxo’l ja pa aldea Buena Vista, paqel che ri tinamit ri’.

Kab’ixik k’o keb’ mul taqom uchapik ri’

Rumal ri b’anow k’ax kamisanik rumal ri’, pa le 6 rech febrero rech 2018 eri q’atb’altzij xutaq uchapik pa aninaqil k’a pa uk’u’x nimatinamit ri’.

Rumal ri toq’inik pwaq eri q’atb’altzij rech Chimaltenango xutaq loq uchapik ri’.

Eri tzukno’jchak ri’ xuq’alajisaj che ri jun achi’ are xutaq ri b’anow toq’inik pwaq pa taq k’ayib’al pa le tinamit ri’. Aretaq eri ajchoq’e xenajtib’ che utojixik pwaq pa kaq’ab’ ri’, xutaq kikamisaxik rumal jun ajkamisanel ri’.

Rumal jun chik b’anow k’ax xub’an ri’, xtaq uterenb’exik ri’, rumal xe’ukamisaj ri keb’ e ajk’ay rech kab’ ri’ pa le colonia Primavera, zona 4 rech Chimaltenango, eri jun b’anow k’ax ri’ are xk’ulmataj pa junab’ir kanoq.