Xchapataj ri taqal rech k’ayin taq k’aqb’alil rech ri pandillas rech ri Barrio 18

115

 

Eri PNC xekowin che uchapik ri ajtaqal rech k’ayin taq k’aqb’al ri are uwinaq ri Barrio 18 k’o pache’ kech achijab’ rech pa rulewal tinamit rech ri Progreso.

Eri xchapik ri’ are jun chi ajchajinel rech ri Sistema Penitenciario, Edner Onner Cortez Castillo ri are 30 ujunab’, alias “El Primo” xuquje’ are kab’ixik kumal ri ajtzukunelab’ e ajchajil tinamit, are ajtaqol rech k’aqb’alil, ub’aq’ k’aqb’al, ch’uti’in taq k’aqb’al ruk’ ub’aq’, chi ke uwinaq ri jun molaj b’anol k’ax kamisanik ri’ xuquje’ ri are xtukux rij pa keb’ junab’ panik’aj ri’.

Kab’ixik eri k’aqb’alil ri are utaqom uk’amik loq pa El Salvador rumal jun chik ub’i’ “El Primo” kab’ixik ri are aj San José Acatempa, Jutiapa.

Eri tzukunik ri’ xb’antaj kowinem ruk’ rumal wa’ xch’ob’ik che ri jun achi ri’ are ukojom che uk’olib’al rech uk’ayixik ri k’aqb’alil ri’ pa taq nim k’ayib’al rech ri Boca del Monte pa Villa Canales, chi’ k’u ri’ eri k’aqb’alil kopan pa kiq’ab’ ri nik’aj molaj b’anol k’ax rech e are chik kakitaq panoq pa taq jalajoj taq tinamit k’o pa we amaq’ ri’.

Eri e ajno’jchakunelab’ rech tzukno’jchak e are k’ut qas xech’ob’ow uwach “El Primo” k’o pa le jun molaj b’anol k’ax rech ri Barrio 18 pa amaq’ tinamit ri’.

Xuquje’ kab’ixik che pa achochib’al ri’ chi’ kikolom wi’ juntir taq ri k’aqb’alil pa amaq’el ri’ sib’alaj chajital kumal taq achijab’ k’o k’aqb’al keqam ri’.

Pane’ qas maja’ kach’ob’ik jorpa’ chi pwaq xumol ruk’ ri’ rumal xuk’ayij taq k’aqb’al ri’, eri tzukunik chi rij xuq’alajisaj che ri “El Primo” ri’ sib’alaj k’o nim k’ayin k’aqb’al maj pa usaqil xub’an ruk’ ri Barrio 18, k’o waqib’ raqarik k’aqb’alil Q14 mil rajil jujun taq.
Rumal k’ut xchapik kab’ixik are wa’ jun q’atenik xb’an che jun molaj b’anol k’ax ri’, rumal k’ut xchapataj jun kanimal chi ke ri e ajk’ayil k’aqb’al rech jun molaj b’anol k’ax ri’.

Xuquje’ eri komonchak rumal ri Ministerio rech Gobernación pa komonb’al ruk’ ri PNC xuquje’ ri Ministerio Público xuquje’ ri chak xkib’an ri’ are xuya’ pa saqil rech xb’antaj kowinem ruk’ rech xchapik ri Cortez Castillo ri’, rumal ri’ k’o k’iyalaj taq k’aqb’alil ruk’ 700 ub’aq’ rech raqarik k’aqb’al xraqataj ri’.