Eri kitaqim ri Fuerzas Especiales rech Ajchajinelab’ (FEP) are kakiq’atij b’anoj k’ax pa tinamit xuquje’ pa taq tinamit che kab’antaj wi ch’ojinik ri’, xcha’ ri ri Sub Comisario Esvin Garpar Jacinto Quiché ri are ri’ we kamik Taqanel rech ri Wokajil rech Fuerzas Especiales rech ri Ajchajinelab’ (FEP).
Eri Jacinto Quiché k’o chik 21 junab’ ruk’ waqib’ ik katajin che b’anoj chakunem ri’ pa le Wokajil Ajchajil Tinamit (PNC) xuquje’ 15 junab’ chi rech ri’ k’o chik pa le FEP, xub’ij k’ut are kab’antaj kowinem kaya’ pa jikomal wari’ kuk’ e jun kaq’o’ lajk’al (1000) chi eqa’lenel ri qas keta’mab’al rech kechajin pa juntir ri amaq’il ri’, pa ronojel ke’umaj ri’ e waqq’o’ jo’k’al (2500) chi eqa’lenelab’ ri’.
Rumal ri’ are rajawaxik karaj che jun utz reqa’lenel ri FEP ri’ xub’ij, eri keb’ qas rajawaxik chi ke ri’ are ri’ e nimantzij xuquje’ e suk’ taq winaqil, “Kojtajin k’ut che uchakuxik ri keb’ uwach ri’ rech qas uch’ob’ik xuquje’ pa amaq’el ub’anik ri’”, man rajawaxik taj eri keb’ junam tane’ kipatanil ri’ xcha’.
K’o kajk’al lajuj q’ij kumajo rech ketijox ri’
Xub’ij k’ut, eri ke’ok pa le Wokajil Chajinem ri’ eri tzijol qas rajawaxik are ri’ rajawaxik kuch’ik ri etab’al rech ri okem pa le tijonem ri’, kutz’aqatisaj ri’ kajk’al lajuj (90) q’ij k’amoj tijonik, ri k’utq’axb’al, ri tijowchuq’ab’, uk’amik ub’anikil uq’atexik ri ch’ojinem, uq’atexik keleq’axik b’i winaq, kesaxik winaq kuk’ e b’anol k’ax, b’anoj kowinem ya’el tob’anem pa taq k’axk’onem pa taq rulewal ri’ xuquje’ k’a te kanoq xk’utun jun molaj eqa’lenel rech kakichupisaj q’aq’ pora’n, xcha’ ri Sbu Comisario.
Pa taq le kajk’al lajuj (90) q’ij ri’ eri ka’winaq chi rech ri’ are rech kakitijoj kib’ ri eqa’lenel che uq’atexik taq ch’ojinik xuquje’ eri jun chik uwach taq q’ij ri’ are rech ketijoxik rech kakik’am retal ub’anikil kesaxik winaq pa k’axk’onem pa taq rulewal ri’, xuquje’ eri jun chik uwach ri’ are rech ketijoxik rech ke’ok pa taq latz’ xuquje’ rech ke’ok pa taq latz’ ta pa taq tinamit ri’ jacha’ pa taq tinamit, xuquje’ rech kaketa’maj ub’anikil kunanem pa taq uq’ijol ch’oj ri’.
Are xmajtaj ri’, xub’ij ri Sub Comisario, e k’o e jok’al (100) chi eqa’lenel kakimaj katijoxik ri’, rumal b’a’ qas k’ax uchuq’ab’ ri tijonem ri’, xa’ e k’awinaq lajuj (50) chi eqa’lenel ri’ kakik’iso kakitijoj kib’ ri’, e are ri’ ke’opan pa k’isb’al rech pa le graduación ri kaya’ wiri’ ri q’eq boina chi ke, che ri are xkaj xkesaj ri’.
Jumpa’ k’ut ke’ok che ri kipatan ri FEP ri’
Chi rij wari’ eri Jacinto Quiché xub’ij k’ut, eri reqa’lenel ri FEP are kekowin chik che b’anoj chomanem xuquje’ aretaq eri q’atb’altzij man kekowin ta chik che ri kak’ulmataj ri’.
Aretaq k’o kak’ulmataj ri’ are chi’ kab’ixik rech ketob’anik wexa’ k’o winaq kakimol kib’ che b’anoj ch’oj ri’, wexa’ k’o ch’oj kab’an pache’ tz’apib’al ri’, are chi’ k’o tzukunem kataqix ub’anik ri’, aretaq e k’o e itzel aj pache’ kek’am b’i pa jun chik k’olib’al ri’ xuquje’ aretaq k’o ya’olchajinik winaqil kab’an ri’ ruk’ kitob’anik nik’aj chik wokajil jachakunb’al ri’.