Eri Viceministro rech Seguridad Gendri Reyes ruk’ ri K’amal b’e rech ri Sistema Penitenciario, Luis Rodolfo Escobar ketajin che solinem pa nab’e q’ij kichak ketajin wi ri e 28 chi achijab’ e tz’apil pache’ rech ri Rehabilitación Penal Pavón ri’.
Eri e tz’apil pache’ ri ketajin che utojik kimak pa le Programa rech ri Regimen Progresivo ketajin k’ut pa taq le chak kikaj ri e are kakib’ano rech utojik uwach ri kimak ri’.
Pa le nab’e q’ij ri’ xetob’anik pa utz’aqik uwach ri nimab’e k’o chi la’ pa le nimawokajil pache’ tz’apib’al Fraijanes, ri k’o nimak’ax xuriq ri’ rumal ri nimajab’ ri’.
Eri Viceministro Reyes xub’ij che we jun chakunem ri’ are kanimaxik le tzij xujit ub’ixik ri K’amal b’e Amaq’ Alejandro Giammattei are chi katajin ri pa b’anoj campaña kanoq ri’, rech ukojik cholchak rech kakisuk’umaj kib’ ri e tz’apil pache’ ri’.
Eri Ministerio rech Gobernación xuquje’ ri Sistema Penitenciario ri’ rech xkicha’o ri e tz’apil pache’ rech ketatb’en pa le ch’ob’otal chak ri’, pa le rilik usolixik kuwujil ri’ xuquje’ are wa’ xta chi ke ri q’atb’altzij rech are jun q’atol tzij kub’ij che utz b’a’ ri’.
Xuquje’ are wa’ katajinik ruk’ kitob’anik ri Wokajil Xatat e Ajchajil Ixim Amaq’ ri’ pa reqa’lenik ri Cuerpo rech Ingenieros rech kasuk’umaxik ri nimab’e chi la’ ruk’ alinaq taq ch’ich’ chakub’al ri’.
Are rech b’a’ kaq’atexik wexa’ k’o kak’ulmataj tane’ ri’ chi saq che ri Japache’ ri’ k’o oxib’ korlim ya’olchajinik chi’, kumal ri e ajchajinelab’ rech ri Grupo Elite rech ri Japache’ ri’, e are k’ut kakisolij ri e ajpache’ ri’ xuquje’ kumal ri Wokajil Ajchajil Tinamit xuquje’ rumal ri Wokajil Xatat e Ajchajil Amaq’ rech b’anoj chajinem chi rij pache’ tz’apib’al ri’.