Pa q’ij lunes rech pa uwach wuqq’ij ri’ xumaj ub’anik ri ya’ltzijol “Peatón Seguro 2021″ pa jalajoj wokja rech pa uk’u’x nimatinamit, xcha’ ri Lilian Lima rech ri Sección de Educación rech ri Unidad rech Uq’atexik Riqoj k’ax xuquje’ rech Pixab’nik rech K’utb’e rech ri Departamento rech Tránsito rech ri Wokajil Ajchajil Tinamit (PNC).
Eri taqim ub’anik ri’ are rech b’a’ eri winaqil e aj iximulewal kakik’am qas uch’ob’ik b’a’ rilik upatan ukojik ri retal q’axib’al rilik ukej juyub’, rumal ri’ are xkoj pa le 8a., 7a. xuquje’ 9a. Avenida xuquje’ 18 calle rech ri zona 1 ri’ chi’ k’u ri’ xjach chi ke ri winaqil jun wujil rech k’utb’al nab’e b’anoj rech na’ojalil ri’.
Xub’ij ri’ eri winaqil xkinimaj uk’amik ub’anik wa’ ri ya’ltzijol «Peatón Seguro», xuquje’ xkib’ij b’a’ che qas kikaj k’ut kakib’an rilik kakiq’axe’j ri nimab’e, rech keq’ax ri k’o wi ri retal q’axnik ukej juyub’ k’utb’e q’axnik ri’ xuquje’ rech kakikoj ri q’axib’al kojom ri’ rech maj jun kuriq tane’ k’ax pa uq’axexik taq nimab’e ri’.
«Kojtajin k’ut che kasik’ixik konojel ri e ajb’inisal ch’ich’ ri’ xuqje’ kejch’ich’ rech kakinimaj kiq’axnik ri winaqil pa taq nimab’e, ruk’ wa’ taqim rech kaya’ kib’e ri winaqil kakiq’axe’j taq nimab’e che kaqan ri’» xcha’ Lilian Lima ri’.
Xuquje’ xub’ij che ri b’anoj ya’ltzijol ri’ are kakib’ano pa keb’ uwach wuqq’ij petinaq ri’ pa taq ri tinamit rech pa uk’u’x nimatinamit rech Iximulew xuquje’ are wa’ chomam chik kab’an na pa rulewal tinamit pa Iximulew ri’ rech te k’u ri’ chik jeri’ kab’an pa juntir we amaq’ ri’.
Eri jachoj ri wujil rech tzijol pixab’nik ri’, chi rij wa’ eri Lima xub’ij ri’ we kamik k’o chik 1,600 chi wujil rech tzijol ri’ jachom chik chi ke ri winaqil rech kakita’maj jas ri kakib’ano wexa’ k’o k’ax kakik’ulmaj pa taq nimab’e ri’.
Pa k’isb’al, xub’ij k’ut, che chi rij ri wujil ri’ k’o wi ri rajilab’al ch’a’wib’al rech kech’a’w wi loq pa aninaqil k’a pa taq tinamit loq.