Ruk’ ub’antajil ri loq’oq’enik ib’ ri’ are rajwaxik ri’, xecha’ ri e’ajtijoxel rech ke’ok pa le Wokajil Ajchajil Tinamit (PNC) ri’, jeri’ xkib’ij ri’ pa le Kiq’ijol ri Ixoqib’ ri’, nab’e ri’ rajwaxik kaqaloq’oq’ej qib’ xuquje’ kaqatijoj qib’ chi rij ronojel ri k’o apanoq pa tinamit ri’ rech kaqab’an ri utz pa ronojel q’ij ri’ xuquje’ rech utz kujk’oji pa ub’i’ we Iximulew ri’.
Eri ajtijoxel rech PNC, sib’alaj xub’ij che are rech kujok pa le wokajil rech q’atenik ri k’ax ri’ rajwaxik b’a’ kujchoman ri’ kaqaq’atej uwach ri itzelb’anik pa taq qatinamit ri’, che ri k’o wi ri ixoqib’ kakaj kichuq’ab’ xuquje’ rech ke’ok che e’ajno’jchakunel ri’.
Eri Angélica Cucul, aj chi la’ Cobán, xub’ij che rajwaxik kaqesaj b’i quk’ ri itzelb’anem ri’ rumal are la’ karesaj uchuq’ab’ utzil chaqe, kub’an k’ax chaqe, “Rumal k’ut eri uj aj ixoqib’ pa Iximulew ri’ chaqij uj kaqaj wi rech kaqab’an utz chi ke ri qal xuquje’ ri e qachalalil, rech k’o le nim utzil kakiriq ri’ pa tinamit”.
E k’o ri jujun e achijab’ e’ajtijoxel ri’, kakib’ij che ri ixoqib’ k’o jun nim kipatanib’al pa tinamit winaqilal ri’, rumal k’ut k’o nim kipatan pa kachoch jeri’ pa kichak.
Eri Erwin Argueta xub’ij che ri kitatab’enik ri ixoqib’ k’o nim kipatanib’al, pa le wokajil ajchajil tinamit ri’ xuquje’ eri e are sib’alaj kakiya’ kanima’ che kanimaxik ri winaqil ri’.
Xuquje’ eri Lisely Cardona, xub’ij che ri are ixoq kurilo k’o nim upatan kilik pa le PNC xuquje’ pa le ya’olchajinem winaqil rumal ketob’an pa le wokajil chajinem ri’. “E pa wochoch sib’alaj kinuto’o ri’ xuquje’ kuya’ nim tob’anik chuwe rech kaqab’an ri utz pa nutinamit”.
Ri William Amador, ajtijoxel rech PNC xub’ij che kukajmaj ri chak kakib’an ri ixoqib’ rumal k’ut eri e are e nan, e mi’al, e achalalil xuquje’ keta’m kakitaq kib’ pa le b’anoj k’i chakunem ri’ xuquje’ kakik’utu pa juntir kena’w che ub’anik ri kitaqkil pa amaq’el ri’.
Pa le b’anoj ya’olchajinem kumal e’ajchajil tinamit ri’ e k’o e utz taq chajinel ri’, ri xkik’ut ri’ che pa achijab’ pa ixoqib’ kena’w che ri ya’olchajinem tzukunik ri’.