Eri uwa’lijsaxik ub’anikil rech ri ya’olchajinik winaqilal xuquje’ rech q’atel k’ax, rech kaq’atexik ri b’anol k’ax ri’, are wa’ jun chi ke uk’u’x ri chakunem kab’an pa le k’ak’ taqawokaj ri’, jeri’ xuya’ utzijolil Alejandro Giammattei Falla, aretaq xya’taj reqale’n rech xok che k’ak’ K’amal b’e Amaq’ rech Iximulew ri’.
Pa le tzijolil xuya’o aretaq xok che reqale’nib’al ri’, ri Giammattei Falla, xuya’ ub’ixik che kukoj na ri’ jun taqanik chi uwach ri Congreso rech ri Amaq’il, rech keq’alajisaxik che ri nik’aj maras kuk’ ri pandillas e ajb’anol nima’q ta k’ax ri’.
“Eri taqanik ri’ are rech keterenb’ex kachapik xuquje’ kek’am b’i pa q’atb’altzij ri’: rech keq’alajixik che e kamisanelab’. Rumal ri’ eri Iximulew are karaj kak’oji pa joremal” xcha’.
Rech kaq’atexik ri b’anow k’ax elaq’ pa taq taqawokajil pa tinamit; rech kab’an tijonem; rech qas tzij k’o q’atb’altzij chi rij ri’ xuquje’ rech kaq’atexik ri wi’jal meb’a’il ri’; ruk’ nik’aj chik uwach utz taq chakunem kab’an pa le taqawokaj ri’, rech kab’an utz che ri ub’antajil pa amaq’ ri’.
Eri k’amoj eqa’lenem patan ri’ are xb’antaj pa le sala Efraín Recinos rech ri Teatro Nacional Miguel Ángel Asturias, chi’ k’u ri’ xetatb’en wi ri q’atb’altzij rech ri Corte Suprema rech Suk’umalil, rech ri Tribunal Supremo Electoral, rech ri Corte rech Constitucionalidad, xuquje’ rech patanel rech taq nimatinamit naj, rech ri winaqilal chomanelab’ pa amaq’, kuk’ nik’aj chik ri’.