Are chi’ xb’antaj ri komonchak kumal ri q’atb’al Tzij rech ri Ministerio rech Gobernación xuquje’ kumal ri q’atol Tzij rech ri Ministerio Público (MP), eri reqa’lenel ri Wokajil Ajchajil Tinamit (PNC) xkichap ri jun winaq salvadoreño ub’i’ a Raúl Antonio Serrano Hernández, 45 ujunab’, alias Gallo Negro o Tigrillo, eri upatan chi la’ El Salvador are urox ajtaqanel kech ri Mara Salvatrucha ri’. Ri are xchap paq’ij jueves 18 rech mayo pa le aldea Las Guacas, Masagua, Escuintla ri’.
Ruk’ ri a Serrano Hernández ri’ xchapataj ri a Byron Antonio Avelar González xuquje’ a Josué Fernando Cáceres Menjívar, ri kab’ixik e uwinaqil ri jun pandillas ri’ kab’e apanoq pa le achtinamit ri’.
Ruk’ jun achi ri’ xchapik kab’ixik chi k’o jun nim q’atenik xb’an chi ke ri jun puq molaj b’anol k’ax ri’, ri k’o k’i taq kamisanik xkib’an ri’. Rumal ri’ pa komonchak tajin kaq’atexik kumal ri q’atb’al Tzij rech El Salvador, jacha ri xq’at uchomaxik pa le nab’e Conferencia Regional rech Ministros xuquje’ Secretarios rech Seguridad ri’, xb’an pa Iximulew pa febrero kanoq rech pa junab’ ri’.
Ri komon q’atenik
Eri b’anoj puqtzukunem ri’ xuquje’ ruk’ ichapik ri’ kumal reqa’lenel ri Centro Antipandillas Transnacional (CAT), rech ri Grupo rech Operaciones Antipandillas (GOA), xuquje’ rech Fuerzas Especiales rech Chajintinamit (FEP) rech ri PNC, pa komonchak kuk’ ri q’atol Tzij rech ri MP. Xkib’an ri tzukunem chi rij jun alias Gallo Negro xuquje’ ub’i’ Tigrillo, sib’alaj naj chik ajtaqol kech ri Mara Salvatrucha pa El Salvador, ri k’i taq mul taqom uchapik pa utinamit ri’ rumal b’anoj taq kamisan winaq ruk’ nik’aj chik itzelalaj taq k’ax xub’ano.
Are chi’ xk’is jun utzukuxik ri’ pa Iximulew, paq’ij viernes 19 rech mayo ri’ eri rajtaqanel ri Subdirección General rech Investigación Criminal (SGIC) xkik’am b’i nik’aj wianq ri’ pa le frontera ruk’ El Salvador, k’o pa Valle Nuevo rech Jutiapa, chi la’ k’ut xjach wi b’i pa kaq’ab’ ri q’atb’al Tzij salvadoreñas rech kechomax chi la’ chi rij ri k’ax xkib’ano.
Eri q’atb’al Tzij ri’, xkib’ij che pa we junab’ ri’ kijachom b’i e 36 chi pandilleros pa kaq’ab’ ri q’atb’al Tzij salvadoreñas. “Ruk’ ri’ are kuk’ut ri tob’anem xuya’ loq ri K’amal B’e Amaq’ Iximulew xuquje’ rumal ri Ministro rech Gobernación, ri are elinaq loq pa xchomax kumal ri q’atb’al Tzij rech rulewal taq nimatinamit, rumal ri’ e k’o k’i e chapom b’i e k’i taq pandilleros e jachom b’i pa achtinamit kepe wiri’”, xcha’ ri Subdirector rech ri SGIC.
Eri taqanel rech ri Wokajil Ajchajil Tinamit rech El Salvador xuloq’aj ri tob’anik xya kumal ri q’atb’al Tzij rech Iximulew rech rumal ri’ xechap b’i nik’aj pandilleros salvadoreños che ri xekanimaj loq pa katinamit.
Jun chik nim q’atenik chi kech ri pandillas ri’
Are wa’ uwach ri chak pa amaq’el tajin kumal ri q’atb’al Tzij rech ri PNC, Pa Masagua chi la’ k’ut xchap wi loq a Henry Omar Soriano Beltrán, 27 ujunab’, alias El Coyote, kab’ixik xchapik rumal man ya’tal chech kab’inik, pa le 10 rech octubre rech 2019, are chi’ xtaq loq uchapik rumal ri q’atb’al Tzij rech La Libertad, El Salvador ri’.
Xuquje’ eri a José Armando Flores Hernández alias El Chele xuquje’ Niño, k’o nimak’ax kamisanik ub’anom rumal ri’ ya’om ta chech xaq tane’ kab’inik xuquje’ k’o k’ax b’iw b’ixik ub’im ke’ukamisaj winaq ri’.
Rumal ri’ eri q’atb’al Tzij sib’alaj xkisik’ij ri winaqil pa tinamit rech xkib’ij chi kech chi kub’ kik’u’x b’a’ chi kij ri wokaj ajchajil tinamit xuquje’ chakib’ij b’a’ kitzijol ri Itzel taq winaq kakib’an ri k’ax chi kech ri’ rech b’a’ kek’oji pa jikomal joremal pa tinamit.