Xechapataj e waqib’ b’anol k’ax pa tzukunem xb’antaj kumal ajtzukunelab’

Are tzukunem ri’ are la’ xb’antaj kumal ri División Especializada rech Investigación Criminal (DEIC), rech ri Wokajil Ajchajil Tinamit (PNC) xuquje’ rumal ri Ministerio Público (MP) ri’, xkichap e waqib’ chi winaqil kab’ixik jalajoj b’anoj k’ax kib’anom, e k’o ak’alab’ xkesaj pa k’ax chi’ xuquje’ k’o jastaq maj pa usaqil xkiriqo, pa taq ri tzukunem solinik xkib’an chi’ xuquje’ eri tzukunem ri’ are la’ xkib’an pa le 11 rech octubre ri’ pa kachoch winaq k’o ch la’ pa Chiquimula ri’, pa Escuintla ri’, pa Jalapa ri’ xuquje’ pa nimatinamit Iximulew.

Rumal k’u ri’ xb’antaj kowonem xchapataj loq jun ixoq ub’i’ al Ana Beatriz Monroy 31 ujunab’, rumal xriqitaj ruk’ jastaq rech b’anoj k’ax achk’ulaj chi ke ak’alab’ ri’. Xriqitaj jun kematz’ib’ab’al ruk’ ub’i’ laptop, jun memoria USB xuquje’ keb’ parapik ch’aweb’al, ri xk’am b’i kumal ri q’atb’al tzij rech kakitzukuj utzijol ri’.

Pa ja k’olib’al xtzukux upam pa zona 4 rech Chiquimula, Chiquimula ri’, xeriqitaj wi e oxib’ chi ak’alab’ ri 11, 13 xuquje’ 15 kijunab’ ri’, ri xek’am b’i pa le Procuraduría General de la Nación (PGN) ri’.

Eri xkamisaxik

Eri a Franklin Enrique Guillen Sandoval, 33 ujunab’ xuquje’ a Jasson Luis Pérez, 27 ujunab’, xtaq kichapik ruma ri Q’atb’al tzij rech Escuintla ri’ pa le oxib’ q’ij rech octubre rech 2022 ri’ rumal xkib’an kamisanik.

Pa le tzukunem ri’ xriqitaj jun k’aqb’al marca SIG SAUER SP 2022, ub’aq’ k’aqb’alil xuquje’ jun ch’aweb’al ri’. Eri xriqitajik xk’am b’i kumal ri tzukunelab’ ri’.

Eri xkib’an elaq’ ri’

Eri a Juan Francisco Seanz Barrios ri are xchapataj ri’ rumal xtaq ucha’ik rumal ri q’atb’al tzij ri’ pa jun tzukunem xb’an pa le 3ª calle y 18ª  avenida, zona 1 rech pa nimatinamit. Chi la’ k’ut xriqitaj wi jun kematz’ib’ab’al are laptop. Xuquje’ eri tzukunelab’ xkik’am b’i ri jastaq rech q’alajisab’al pa jun jachakub’al rech q’atol tzij k’o pa zona 10 rech pa nimatinamit Iximulew ri’.

Eri Seanz Barrios are xtaq uchapik ri’ rumal xub’an k’ax elaq’, rech xub’an ajq’inomal ruk’ pwaq jastaq maj pa usaqil ri’ xuquje’ rumal xaq katajin xub’an elaq’ ri’, rumal ri’ xtaq uchapik rumal ri Q’atb’al tzij rech pa nimatinamit Iximulew pa le 28 rech septiembre rech 2022 ri’.

Eri xub’an k’ax che jun ali

Eri tzukunelab’ e q’atenel b’anoj k’ax achk’ulaj ri’ xkitzuj loq che xkichap jun achi ub’i’ a José Ángel Pérez Najera, 20 ujunab’, ri kab’ixik xtaq uchapik rumal ri Q’atb’al tzij rech ri tinamit Jalapa ri’, rumal xub’an k’ax achk’ulaj chi re jun winaq ri’.

Kab’ixik eri jun a Pérez Najera ri’ are xub’an k’ax achk’ulaj chi re jun ali oxlajuj ujunab’ pa San Pedro Pinula, Jalapa ri’, pa le ik’ junio rech ri 2021 ri’.

Eri xqupij che’ ri’

Eri Amado Vásquez Domingo 45 ujunab’, kab’ixik rumal xub’an k’ax che’ k’ache’laj, xchap loq kumal ri wokajil ajchajinelab’ pa jun ja k’olib’al xtzukuxik pa Cuilco, Chinab’jul.
Eri jun achi ri’ xk’am b’i pa Q’atb’al tzij rech Cuilco, Chinab’jul, chi la’ k’u xsik’ix wi k’a pa le nab’e q’ij q’ij rech junio rech pa we junab’ ri’.

Noticias Recientes