El Director General Adjunto, Edwin Ardiano y el Subdirector General rech Investigación Criminal Eri Nery Benito Hernández rech ri Wokajil Ajchajil Tinamit (PNC) xkiya’ loq utzijol pa le b’anoj tzijolinem che ri xb’an pa le Ministerio Público (MP) rech xkiya’ loq utzijol ri upatan xub’an ri tzukunem xb’antaj pa rulewal tinamit rech Izabal pa we uwach wuqq’ij ri’.
Pa le upatanib’al ri tzukunem xb’antaj kumal ri reqa’lenelab’ ri División Especializada rech Investigación Criminal (DEIC), ri Sub Dirección General rech Investigación Criminal (SGIC), ri Sub Dirección General rech Análisis rech Información Antinarcótica (SGAIA) kumal nik’aj chik puqchajinelab’ ri’ ri xekowinik xkichap loq nik’aj elaq’omab’ e ajtoq’il pwaq, e ajesal kachib’al ak’alab’ kab’an chi kech, ri e ajkojol winaq pa ch’ijomchak xuquje’ ri e ajb’anol elaq’ chi rij k’amq’aq’ chi kech winaq ri’.
Eri Ardiano, xuya’ ub’ixik che pa le Operación Caribe, k’o 180 chi tzukunik xb’antajik, e k’o k’aqb’alil xeriqitajik, k’o Q102, 100.00 chi pwaqil xriqitaj loq, k’o wajxaqib’ chi ch’ich’ xeriqitaj loq xuquje’ e k’o juk’al jo’ob’ (25) chi winaqil e ajb’anol k’ax xechapataj loq, e k’o kajib’ chi ak’alab’ xe’esax loq pa kiq’ab’ b’anol k’ax chi kech, k’o awan kunb’alil, k’aqb’alil, je’lalaj taq che’, je’lalaj ab’aj jade xuquje’ cuarzo ruk’ nik’aj chi jastaq maj pa usaqil xeriqitaj loq.
Eri nik’aj elaq’omab’ xechapataj ri’
Eri Subdirector General rech Investigación Criminal (SGIC) Nery Benito, xub’ij pa tzijolinem pa le MP ri’, xutzuj ri’ ri ub’anik ri k’ax elaq’ xkib’an ri’ nik’aj elaq’omab’ kikojom kib’ che rajchak ri Empresa Eléctrica, aretaq xkib’an ri elaq’ jo’snik chi ke ri winaq, che pa oxib’ junab’ chik k’o Q. 2.5 chi pwaq ri’ eleq’am chi rij ukojik ri k’amq’aq’, aretaq xkib’an ri k’ax elaq’ kikojom katz’iyaq rech ri empresas e k’o ri’. Rumal ri’ eri Comisario General Benito xuta toq’ob’ ub’ixik chi kech ri winaq rech chakib’ij b’a’ loq ri k’ax kakilo kab’anik xuquje’ chakib’ij b’a’ loq pa le rajilab’al ri ch’a’wib’alil rech PNC.
Jewa’ ri b’anoj elaq’ kumal ri’
Aretaq xeterenb’ex utzukuxik kitzijol ri jun molaj e elaq’omab’ ri’ ri xejo’san chi kech ri winaq, che maj pa usaqil b’a’ ukojik ri k’amq’aq’, are la’ xech’ob’otajik rumal ri b’iw ub’ixik xub’an loq ri Empresa Eléctrica rech Iximulew, che ri nik’aj winaq elaq’omab’ xechapatajik are kikojom kib’ che e rajchak xuquje’ e rajsolinel ri’.
Aretaq xe’opan cho taq kachoch ri winaq xkib’ij chi kech che man utz ri contadores xuquje’ ukojik ri k’amq’aq’ b’anom pa kachoch ri’, xkib’ij che rumal man utz ta ub’anik ukojik ri k’amq’aq’ ri’ eri tojb’al k’o chi kij are rech Q.7,000 pa Q.28,000 chi pwaq kakitoj ri’ are wa’ xkitoj ri wina pa taq pwaqb’al ja ri’. Rumal ri’ e pa le b’anoj tzukunem xb’antaj we kamik e k’o atz’iyaqb’al are xkikoj ri’ are chi’ xe’opan che kijo’saxik ri winaq pa taq kachoch ri’.