K’a xmajtaj ri’ utaqanik ri Ministro rech Gobernación Francisco Jiménez ri’ qas xutaq uq’atexik taq e ajtoq’inel pwaq ri’, are chi’ xub’ij che are jun la’ jun mak b’anoj k’ax ri’ ri nim k’axk’olil kub’an chi kech ri winaqil e aj iximulew. Rumal ri’ xtaq kaq’atexik k’a pa le Ministerio rech Gobernación, pa le q’ij kamik xb’antaj 62 chi tzukunem pa kachoch winaq pa taq tinamit rech ri amaq’il, ri nab’ejsam ub’anik rumal ri Wokajil Taqom Chajim Timamit (PNC) xuquje’ kumal reqa’lenelab’ ri jalajoj taq uwokajilal ri taqom chajinem ri’.
Are b’a rech xb’antaj kowonem xb’an ri tzukunem ri’ ruk’ taq ri sak’ajil chajim tinamit ri’. Are la’ sib’alaj utz xb’antaj ri’, chi la’ e k’o winaq xechap ri’, ruk’ ri xriqitajik kuq’alajisaj uwach wari’.
K’a pa oxlajuj kajb’al ri’, xya’taj utzijol kumal ri q’atb’al tzij rech taqom chajim tinamit chi e k’o 43 chi uwinaqil taq pandilla rech ri Barrio 18 xechapatajik, ri Mara Salvatrucha xuquje’ kuk’ ri nik’aj e elesal kachib’al elaq’omab’. Eri xechap ri’ are are k’ut qas xkitoq’ij pwaq chi kech ri e ajchoq’e taq nimach’ich’ ereb’al winaq pa tinamit, e ajk’ayinelab’, e ajjachon jastaq rech k’ayij pa taq nimab’e xuquje’ chi kech winaq e ajk’ulja. Chi la’ k’ut qas xkitoq’ij wi pwa chi kech ri winaqil rech kakikamisaj taj, rech kek’ayinik xuquje’ rech kakib’an ta k’ax chi kech.
Are la xtaq kaq’atexik rumal ri q’atb’al tzij rech taq uq’ab’tinamit rech uk’u’x nimatinamt Iximulew, Villa Nueva xuque’ rech Mixco rech rulewal uk’u’x nimatinamit Iximulew xuquje’ rech San Marcos, Escuintla, Xe’laju’, Quiché, Izabal, Santa Rosa, Sacatepéquez xuquje’ rech Chimaltenango ri’.
Ruk’ katob’anik ri e ajchajil tinamt, ri q’atol tzij rech ri Ministerio Público ri ke’achb’ilan pa yakon taq tzijol ri’.