Eri jun alerta roja xtaq ub’anik rumal ri Organización Internacional rech Policía Criminal (Interpol) are la’ k’o jun uchuq’ab’ upatanib’al man xaq rech ketzukuxik, keriq loq xuquje’ rech kechap loq e ajb’anol k’ax pa taq nimatinamit pa uwachulew, xane’ are rech b’a’ kab’an utzijob’exik xuquje’ ri tob’anik chi kuwach ri wokaj ajchajil tinamit kuk’ ri wokaj e ajchajilanel rech taq ri nimatinamit amaq’ib’ rech kaq’atexik kichapik ri e ajb’anol k’ax rech kek’am b’i pa q’atb’al tzij.
Eri Ministro rech Gobernación, Francisco Jiménez, sib’alaj xub’ij che ri komonchak kumal ri Interpol kuk’ ri wokaj e ajchajilanem rech taq nimatinamit amaq’ib’ pa uwachulew, jacha ruk’ ri Oficina rech Aduanas xuquje’ Protección Fronteriza rech Estados Unidos (CBP), jacha pa le uchapik loq jun achi kamisanel a Vasquez Rabanales, exsubinspector rech ajchajilanem tinamit, ri xtzukuxik rumal ri kamisanik xub’an pa tinamit San Andrés Iztapa, Chimaltenango.
“Eri tob’anem chi kuwach kumal ri keb’ wokaj e ajchajilanem are la’ xub’an jun nim upatanib’al rech pa aninaqil xriqitaj loq jun expolicía ri’” xcha’ ri nim taqawokajnel.
Xuquje’ eri Taqawokajnel Ya’olchajinem pa Amaq’ sib’alaj xuya ub’ixik chi k’o nim upatanib’al ri nimatob’anem kumal ri nimatinamit pa uwachulew rech utaqixik ri b’anoj chajinem, ri uk’am rib’ ruk’ ri kakib’an ri wokaj e ajchajilanem ruk’ ri chakub’al rajwaxik xuquje’ rech kechap loq ri e ajb’anol k’ax che xkanij kib’. Xub’ij chik “Kaqaterne’j ub’anik ri chakunem ri’ ruk’ ri wokaj e ajchajilanel rech Estados Unidos xuquje’ ri Interpol. Man chuwe’q taj, kamik uq’ij ri chajilanem ri’”.
Rumal ri’, eri taqanel rech ri Oficina Regional INTERPOL rech América Central, Walter Lazo, xub’ij che ri Wokaj Ajchajilanem Tinamit (PNC) rech Iximulew ukojom ri’ jun ub’anom ukojik jun utzilaj b’ixik tzukunem, rumal ri’ e k’i winaq e chapom chik pa junab’ ri’. “Pawe q’ij kamik ri’, eri ub’anik ri b’ixik toq’inem tzukunik kumal taq ri nimatinamit k’o ni upatanib’al rech katz’apixik kib’e pa k’ulb’a’t rech kekanimaj taj xuquje’ rech kakib’ij taj che maj kaq’atexik rumal ri k’ax kamisanik kakib’an ri”, xcha’ ri a Lazo.
K’o nim upatanib’al ri q’atenem rumal ri Interpol ri’ pa ya’ik ub’ixik rech pa aninaqil kechap loq ri e ajb’anol k’ax pa taq nimatinamit pa uwachulew, jeri’ rech kab’an utzijob’exik xuquje’ uta’ik kumal ri wokaj e ajchajilenel rech taq ri 196 chi amaq’ib’ nimatinamit, jacha ri Iximulew. Xuquje’ eri nimatob’anem ruk’ ri CBP are la’ k’o nim upatan ub’anom pa le ya’ik uchuq’ab’ ri chajinem pa portuaria ri’, pa aeroportuaria xuquje’ pa le kaq’atexik ri molaj b’anol k’ax pa tinamit.