Pawe q’ij 18 rech agosto ri’, eri reqa’lenelab’ ri wokaj ajchajinelab’ e ajq’atenel ri ajb’anol k’ax kakib’an Ch’ijom K’ax chi ke Winaqil, rech ri División Especializada rech Investigación Criminal (DEIC), rech ri Wokajil Ajchajil Tinamit (PNC), xkib’an k’i taq tzukunem chaq’ab’ pa rachoch k’ayib’al tzam itzelb’anik rech Xe’laju’, chi la’ k’ut xriqitaj wi jun q’apoj ali 16 ujunab’ xuquje’ ri xechap wi e oxib’ winaqil are chi’ xeriqitajik ketajin che b’anoj k’ayin tzam chi ke e q’apojil.
Eri tzukunem xb’an pa komonchak kumal ri e ajchajil tinamit kuk’ ri Ministerio Público (MP) are uwach ri puqchajinem tajin pa komonchak pa taq ri jalajoj rachoch k’ayin tzam pa tinamit ri’. Rumal ri’ eri q’atb’al tzij rech ri PNC xkiya loq utzijol che pa jun k’ayib’al tzam chaq’ab’ ri’ k’o pa le 6a calle 14-30 zona 3 rech Xe’laju’, chi la’ xriq wi jun q’apoj ali 16 ujunab’, are winaq kape pa San Marcos, rumal ri’ xk’am b’i pa le Procuraduría General rech ri Amaq’ (PGN) rech kab’an uchomaxik xuquje’ rech keta’maxik ri chak xub’an pa chi la’ k’ut.
Xuquje’ xchap jun achi ub’i’ a Danilo Eduardo Mendoza Grijalva, 48 ujunab’; a Vielman Raúl Lemus Escobar, 40 ujunab’, xuquje’ a Óscar David Soberanis De León, 38 ujunab’, kab’ixik are ke’ukulaj ri ab’om alitom rech kakiloq’ ri tzam chi la’ k’ut xuquje’ rumal are ajk’ayin rech ri tzam chi la’ k’ut ruk’ Itzel taq b’anob’alil chi ke ri’.