Rumal k’o le winaq xuya ub’ixik rumal ri’ pa le 17 rech agosto eri reqa’lenelab’ ri comisaría rech Jalapa xkiriq junaj ala kajib’ ujunab’ yach’atil uq’ab’ xuquje’ ch’ayom yach’om pa le caserío El Aguacatillo, Mataquescuintla, rech pa rulewal tinamit ri’.
Eri q’atb’al tzij xkib’ij che ri alaj ala ak’al ri’ yach’atil uq’ab’ chi rij chi kolob’, xuquje’ q’alaj chi ch’ayomaj, k’o retal chi rij uch’akul ri’.
Rumal ri’, eri reqa’lenel chajin tinamit ri’ pa aninaqil xe’opan che uto’ik ri alaj ala ri’, rech te k’u ri’ xkik’am b’i pa jun rachoch nimaja rech kunanib’al xuquje’ rech te k’u ri’ xkisik’ij le Procuraduría General rech ri Amaq’ Nimatinamit (PGN) rech kub’an utzil uchomaxik le rilik ri’.
Eri wokajil rech tzukuninem chi rij taq wari’ e are sib’alaj xkitzukuj jachin winaq xkib’an ri k’ax che ri alaj ala k’ate kajib’ ujunab’ ri’.
Are wa’ le oxib’ k’ax xriqitaj rumal ri PNC rech kato’ik ri ak’alab’ b’anom k’ax chi kech. Eri nab’e xriqitaj pa Chimaltenango ri, chi la’ k’ut k’o jun ixoq ri kuya kanoq utukel ri alaj ral k’ate job’ ujunab’ uyach’om kanoq che ri jun che’b’al; ri ukab’ chik pa Masagua, Escuintla xriqitaj wiri’, pa le oxib’ q’ij rech junio, chi la’ k’ut le nan ixoq uyach’om wi ri alaj ral k’ate keb’ ujunab’.