Eri reqa’lenel le División Especializada rech Investigación Criminal (DEIC) rech ri Wokajil Ajchajil Tinamit (PNC) kamik xkib’an ri tzukunem pa jalajoj taq k’olib’al japache’ k’o pa Xe’laju’, pa Chimaltenango xuquje’ Iximulew. Eri tzukunem ri’ xuya pa retal ri’ rech xb’an kowonem xechapik e wajxaqib’ rajchajinel ri Japache’ Tz’apib’al (SP).
E e are k’ut a Waldin “N”, a Elmer “N”, a Milton “N”, a José “N”, a Alonzo “N”, a José “N”, a Edin “N” xuquje’ a Jorge “N”, ri kab’ixik k’o ri kimak xkib’ano. Konojel ri’ kab’ixik xechapik xejach pa kaq’ab’ ri q’atb’al tzij ri kachoman kech.
Eri xechapik chi la’ pa le Granja Modelo rech Rehabilitación Cantel xuquje’ pa le Centro Penal rech Justicia pa Xe’laju’; pa le Centro rech Detención Preventiva kech Achijab’ “Pavón”, Fraijanes,Iximulew, xuquje’ chi uwach le Centro rech Japache’ rech Chimaltenango.
Eri xk’ulmataj ri’
Eri q’atb’al tzij xkib’ij, eri tzukunem are la’ xb’anik rech xterenb’ex ub’anik le tzukunik rech uq’alajisaxik uwach ri kikamisaxik ri kab’lajuj chi e’ajpache’ pa le Granja Penal rech Rehabilitación Cantel, pa le 26 rch mayo rech ri 2020 xuquje’ pa le 23 rech enero rech 2024. Eri b’anoj k’ax ri’ are kuq’alajisaj uwach ri maj chajinik b’anom pa le japache’ tz’apib’al kumal ri e’ajchajinel ri xkib’an ri k’ax pa le japache’ ri’.
Eri Wokom K’amal B’e Amaq’ Iximulew pa le reqele’n uchak le Ministerio rech Gobernación (Mingob) kukub’isaj ub’anik le chak rech uq’atexik taq ri itzelb’anik pa taqawokajil xuquje’ rech ya’ik uchuq’ab’ le chajinem pa le wokajil japache’ rech ri qatinamit.