Eri reqa’lenelab’ ri División Especializada rech Investigación Criminal (DEIC), rech ri Wokajil Ajchajil Tinamit (PNC), xq’atij jun molaj b’anol toq’inik pwaq rech ri Mara Salvatrucha (MS) pa le puqchajinem q’atenik xb’an kakmik pa jalajoj taq k’olib’al rech ri uk’u’x nimatinamit Iximulew, pa Villa Nueva xuquje’ pa nik’aj chik k’olib’alil rech rulewal tinamit, ruk’ katob’anik ri q’atol tzij rech ri Ministerio Público (MP).
Pa le b’anoj tzukunem q’atenik ri’ xechap loq ri winaqil ri’ kib’i’ a José “N”, 49 ujunab; ri Allisson “N”, 30 ujunab’; a Noé “N”, 31 ujunab’; a Ricardo “N”, 28 ujunab’; al Elvia “N”, 49 ujunab’; a Jesús “N”, 43 ujunab’; al Ángela “N”, 19 ujunab’; a Jeshua “N”, 20 ujunab’; a Pedro “N”, 22 ujunab’, al Carmen “N”, 22 ujunab’, eri kimak kab’ixik xumal xkib’an toq’inik pwaq. Are chi’ xkilo ri kitzijol pa le PNC, xb’ixik che k’o ri kimak kib’anom pa le 2018 xuquje’ pa le 2021 ri’, xuquje’ ri a José k’o ri umak ri’ pa le 2019.
Xuquje’ xriqitaj loq keb’ chi ch’aweb’al rech eqam ri are kab’ixik rech kuya uchuq’ab’ ri tzukunem tajin chi rij ri’. Eri nik’aj xechapik xek’am b’i pa q’atb’al tzij ri’ rech kechomax chi rij ri k’ax ri kimak xkib’an ri’.
Eri tzukno’jchak chi rij ri’ are xuq’alajiisaj ub’ixik che ri jun molaj b’anol k’ax ri’ are sib’alaj xutoq’ila’ chom pwaq chi ke ri e’ajk’ayinelab’ rech uq’ab’ tinamit Iximulew rech kakitoj ri pwaq chi wuqutaq q’ij ri’ rech kekamisax ta kumal. Eri q’atenik ri’ are la’ jun eqele’mchak tajin ub’anik kumal ri wokajil ajchajil tinamit pa le uq’atexik ri jun b’anoj k’ax ri’ xuquje’ rech uq’atexik ri nuk’molaj b’anol k’ax pa rulewal ri tinamit ri’.