Le ujachik le Rachoch Tz’apib’al Achijab’ le Sib’alaj Chajitalik Renovación I, k’o pa Escuintla ri’, chi rij k’u ri’ le K’amal B’e Amaq’, Bernardo Arévalo, xub’ij are wa’ jun nimachak rech xsuk’umax le Rachoch ri Japache’ Tz’apib’al ri’ (SP), jeri’ are rech ya’ik uchuq’ab’ ri b’anoj chajinem pa taq le rachoch ri japache’ tz’apib’al pa Iximulew ri’.

Xuquje’ are la’ rech kasuk’umaxik kakojik e k’ak’ e’ajchajinel pa japache’ ri’ xuquje’ rech kaq’atexik chi maj jun chik nim uq’ij tane’ chi’ pa le rachoch taq ri japache’ tz’apib’al pa rulewal qatinamit.

Le Nim K’amal B’e Amaq’ Bernardo Arévalo xopan pa le loq’ ilb’anem ri’, rumal ri’ chi la’ k’ut sib’alaj xuya wi ub’ixik le nim upatanib’al le tz’apib’al taq achijab’ Renovación “, are la’ jun b’anoj k’ak’ taqanem kajipix ub’anikil pa ronojel rachoch taq ri japache’ tz’apib’al pa tinamit. Xuquje’ sib’alaj xub’ij che rumal le uchak le Taqawokaj Ya’olchajinem pa amaq’ are la’ xub’ano rech xb’antaj kowonem xk’extajik ri kitz’apexik le winaq pa japache’, rech maj jun tab’a’ nim uq’ij tane’ chi’, are la’ rech kaq’atexik ri b’anoj itzelal elaq’ chi la’ ri’.

 “Le tinamit rech Iximulew, are jun katinamit le e eloq’, le e utz, le e’ajchak winaqib’, e are k’ut le xaqamajo kachajixik pa kub’al k’u’x kek’oji rumal are tz’aqat chi kech. Le japache’ ri’ man rech ta chik kab’an ri k’ax chi’, jacha le xb’an kanoq, chanim are chik uwach le b’anoj utzilem chi kech ri e’ajchalalaxik e’aj iximulew. Are chik kaqak’utu, chewe chanim, qastzij b’a’ kab’antaj kowonem ri ya’olchajinem tob’anik chi kech le winaqilal man je ta chik ruk’ le itzelal jacha xb’an kanoq pa taq le q’ij xq’axik” xcha’ le Nim K’amal B’e Amaq’.

Rumal k’u ri’, le Ministro rech Gobernación, Francisco Jiménez sib’alaj xub’ij che ruk’ le centro Renovación I, xmajtaj ub’anik le k’ak’ uwach chajinem pa le Sistema Penitenciario xuquje’ rech uq’atexik ri kib’anom k’ax chi rech le uk’aslemalil le k’ache’laj uwachulew.  Xuquje’ xub’ij eri rachoch japache’ ri’ are rech ke’uq’i’o e 260 e’itzel winaq rech ketz’apixik, ri nik’aj kakib’an Itzel toq’inik pwaq ri’.

“Kaqajach k’ut jun utzalaj japache’ qas suk’ub’am ruk’ utz ilonem kab’an ri’ rech pa jikomal kab’an le chajinem chi’ rech maj jun b’anoj k’ax chik kab’an tane’chik chi’ pa le japache’, jacha ta k’ut ruk’ ri xb’an kanoq pa taq le q’ij xq’axik. Le kiwilo ri’ man xaq kunam tane’ ri’, are wa’ jun utz usuk’b’exik xb’anik, jun k’ak’ uyakik xb’an ri’ rech maj jun chi kech ri e tz’apilik kakikoj ta chik ch’ich’ib’al rech ketzijon apan chi kuwach kuk’ nik’aj chik winaq” xcha’ are chi’ xuk’is le utz’ij le Taqawokaj Ya’olchajinem pa Amaq’ Tinamit.

Pa le b’inik wa’katem xkib’an pa le k’ak’ suk’ub’am rech ri japache’, le q’atb’al tzij chi’ xkisolij we utz ri chajinem chi’, xkilo we utz le uchi’ ja, le wentana xuquje’ le tz’aq tapya kojom pa le jujun nimaja k’olib’al pa japache’ ri’. Xuquje’ xkib’an le rilik upatan le esal rachib’al wujil (escáneres), le esam rachib’al chajinem (videovigilancia) chi la’ pa le japache’ xuquje’ le upatan le kematz’ib’ab’al le kakoj pa le rilik kitzijol le winaqib’.

Le k’ak’ yakonem uwokik le japache’ k’olib’al ri’ are xnajtib’ kejib’ ik’ chanim k’ut e k’o kejib’ nimaja rech ketz’apib’ ketas wi ri e’ajpache’ chi’. Jeri’ k’o jun upam nimaja rech ilonb’al q’atchak ri k’o chisaq chi rech ri japache’, rech kitasam wi kib’ le e’ajchajinelab’ ri’ rech kitunum ta kib’ kuk’ ri winaq e tz’apilik.

Xuquje’ k’o nimaja rech kunan winaq kojom ri’ ri k’o juntir uchakunb’al, xuquje’ k’o jun nimaja rech videoconferencias rech q’atoj tzij kojom ri’ rech man k’ot chi jun ajpache’ kak’am b’i pa taq le q’atb’al tzij, pa taq le rachoch kunanib’al winaq. Eri pwaq rajil le sxachik k’o Q3 millones 175 mil xkoj pa le uyakik , xuquje’ k’o Q1 millón 355 xsach pa le rajil le jastaq chakunb’al xloq’ik.