Pa le k’isb’al wuqq’ij ri’ xriqitaj 9.8 nima’q chi eqa’n rech cocaína pa jun nimajukub’ ch’ich’ pa le Puerto Multimodal Caucedo, República Dominicana, le Ministro rech Gobernación, Francisco Jiménez, sib’alaj xuya ub’ixik che ri eqa’n k’olib’al awan kunb’al ri’ are xriqitaj pa le jun nimajukub’ ch’ich’ are chi’ xq’axik pa taq le puertos rech aj iximulew ri’ xuquje’ sib’alaj xuya ub’ixik che katajin jun nim q’atexik ri narcotráfico pa rulewal nimatinamit ri’.

“Qaya’om qatzij ri’ pa le nimatob’anem pa taqawokajilal pa tinamit xuquje’ kuk’ taq ri nimatinamit rech ya’ik ub’ixik ucholajil ri jun nim q’atenik ri’. Eri ub’ixik che chi’ tane’ pa Iximulew xk’amataj wi b’i le jun kaxonach’ich’ ruk’ ri cocaína ri’ man tzij taj, man je ta ri’”, xcha’ le nimatat Jiménez pa le nuk’tzijolinem xb’an rumal le Wokom K’amal B’e Amaq’.

Xuquje’ sibalaj xub’ij eri nimatob’anem are sib’alaj tajin ub’anik kuk’ ri q’atb’al tzij rech ri República Dominicana rech kaq’alisaxik upetik ri awan kunb’al che ri xriqitaj kanoq chi la’ pa le puerto caribeño.

“E k’o jujun taq winaqilal ri kakitz’ib’aj pa taq uwachwuj pa kaqiq’ e’are kakaj kakib’ij chi xa’ man kekowon taj kaqaq’atij r narcotráfico pa Iximulew. Ronojel wari’ man tzij taj. Rumal k’ut pa le nab’e taq lajuj ik’ rech qachak uj qariqom chik sib’alaj chom uwach ri awan kunb’al ri’ man je ta ri’ b’anom pa taq le junab’ xq’axik”, xcha’.

Ri nimajukub’ ch’ich’

Ri jun nimajukub’ ch’ich’ upetik ri’ chi la’ Veracruz, México, xopan pa Puerto Barrios, Iximulew ri’. Pa ropanik pa le puerto ri’, k’o eqa’n xok’ow che uk’amik chi la’ kab’ixik. Te k’u ri’ le nimajukub’ ch’ich’ ri’ xuchap b’enam pa B’elica, keb’ xq’ax wiri’: ri anb’e pa Puerto Cortez, Honduras, xuquje’ le ukab’ xtak’ab’ pa le Puerto Multimodal Caucedo, República Dominicana, chi la’ k’ut xriqitaj wi ri awan kunb’al.