Pa le utaqanik le Ministerio rech Gobernación sib’alaj tajin runimal chajinem kumal reqa’lenelab’ ri wokajil ajchajil tinamit rech uq’atexik ri molaj b’anoj k’ax kuk’ ri kakib’an ri k’ax pa taq nimatinamit apanoq. Eri ya’olchajinem ri’ are la’ k’o nim upatanib’al pa le kaq’atexik ri e’ajb’anol ri k’ax ri’, ri kachapik ri e’ajb’anol k’ax, jeri’ le ya’ik uchuq’ab’ ri b’anoj chajinem q’atenik pa ronojel rulewal tinamit.

Le k’amal b’en taqanem rech ri Wokajil Ajchajil Tinamit (PNC), David Custodio Boteo, pa jun q’axeb’al tzij ya’oltzijolinem pa Noti 7, sib’alaj xuya utzijol ri kachapik xb’anik ri e 14 chi uwinaqil ri jun molaj b’anol k’ax che ri kekamisanik, che ri kakik’ayij awan jastaq kunb’al je jas le kakib’an elaq’ toq’inik pwaq, ri xechap pa le tzukunem xb’an pa Suchitepéquez, Retalhuleu xuquje’ pa nimatinamit Xe’laju’. Le Custodio Boteo chi rij ri xb’an ri’ xub’ij che pa le puqchajinem tzukunik xriqitaj loq 16 chi k’aqb’alil, 14 chi ch’aweb’alib’al rech eqam, Q60 mil 100 chi pwaq b’otolik xriqik, 36 chi k’olib’alil ruk’ marihuana ri’, 33 chi ware k’olib’al rilik ruk’ cocaína, ruk’ k’iyalaj ub’aq’ ka’qb’alil, ruk’ uk’olib’alib’al.

El Custodio Botero sib’alaj xub’ij, che e k’o keb’ achijab’ xechap kumal reqa’lenel le PNC, rumal ri’ xub’ij chi k’o jun nim upatanib’al kacha’ik kuwach ri rajchajinelab’ ri taqawokajil ri’. Je jas xub’ij ri’ che ruk’ kachapik ri winaq e b’anol k’ax are rech kek’am b’i pa q’atb’al tzij, pa japache’ tz’apib’al ri’, xuquje’ rech qas b’a’ rech keqaj pa uq’ab’ q’atb’al tzij ri’ rech kakub’isax kak’u’x le winaqilal pa tinamit chi rij kachak ri e’ajchajinelab’ pa tinamit.

Xuquje’ le k’amal b’e chajin tinamit a Custodio Boteo sib’alaj xub’ij chi xa’rumal pa aninaqil xe’opanik le e’ajchajin tinamit xb’antaj kowonem xechap ri keb’ pandilleros e’uwinaqil ri jun Mara Salvatrucha, ri xkib’an kaq’anik iwir pa le zona 1 pa runimal nimatinamit. Xub’ij k’ut katajin ri tzukno’jchak rech kaq’alajisax ri jun b’anoj k’ax k’aqanik ri’, rumal ri’ sib’alaj katajin ri utzukuxik uwach ri jun k’ax ri’ chi kuwach nik’aj pandillas e k’ule’lanik ri’.

Pa le tzukno’jchak ri’, eri wokajil e’ajchajin tinamit xkiriq jun k’aqb’al ri eleq’am ri’ pa le zona 6 rech runimal nimatinamit, je jas le uriqik loq jun kejach’ich’ ri eleq’am kumal nik’aj b’anol k’ax che ri xechap ri’ ri are la’ kakojom rech are ke’animajik chi kech ri q’atb’al tzij ri’. Eri nik’aj ri’ xek’am b’i pa le nimaq’atb’al tzij ub’i’ Torre de Tribunales rech katerne’x uq’atik tzij pa kiwi chi rij ri k’ax xkib’ano.

Sib’alaj pa aninaqil xechap k’ut

Pa jun ub’ixik utzijol xumal le a Custodio Boteo ri’ xub’ij che xechap k’ut nik’aj achijab’ che ri xkib’an jun k’aqanem iwir pa el kilómetro 22.5 rech le ruta CA1 Oriente ri’.  “Eri jun achi xchap ri’ xch’ob’ uwach, ub’i’ a José N, uwinaq venezolana, ri xk’am b’i pa le Torre de Tribunales ri’, xub’ij che are ub’i’ a Byron N, aj winaq achi colombiana. Chi la’ k’ut xmajtaj wi loq utzukuxik utzijol ri jun achi ri’ rumal le Interpol-Guatemala,”, xcha’.

“K’o keb’ ub’anikil utzijol ri’: are jun k’ayin awan kunb’al chi la’, ri jun chi ub’ixik ri’ chi xa’ taqom ukamisaxik ri jun narcotraficante uwinaq hondureña upetib’alil, jun itzelalaj kamisanel ri xpe pa qatinamit ri’. Ri nab’e uq’alajisaxik ri’, kab’ixik che ri are k’o oxib’ q’ij opaninaq pa rulewal qatinamit che ri xb’an ri jun k’aqanem ri’, achb’ilam rumal le rixoqil”, xcha’ le a Custodio Boteo.

Pa jun k’aqanem ri’, xkam jun kamisanel ri’ ri jun chik xchap pa jun nimak’ayib’al rech chi la’ k’ut. Te k’u ri’, eri wokajil ajchajil tinamit, pa jun komon tob’anik kuk’ rajq’atol tzij ri MP, xkimaj k’ut ri tzukno’jchak chi rij wari’ rech kakiq’alajisaj uwach ri jun b’anoj k’ax ri’.