Pa aninaqil eri reqa’lenel le División Especializada rech Investigación Criminal (DEIC) rech ri Wokajil Ajchajil Tinamit (PNC) xekowon che uchapik jun achi xub’an ri k’ax ub’i’ a Julio Emmanuel “N”, 22 ujunab’, are kab’ixik xuch’ay jun q’apoj ali ajtijoxel pa le zona 1 k’o pa uk’u’x nimatinamit. Ri k’ax ri’ xub’ano are xq’alajin pa le cámara rech videovigilancia k’o chi la’ k’ut.
Le Vicepresidenta rech Amaq’ Nimatinamit, Karin Herrera, xub’ij pa le uwachwuj X sib’alaj kab’an utzukuxik uwach ri jun b’anoj k’ax ri’ kumal ri q’atb’al tzij rech ri Ministerio rech Gobernación, rech kab’an jun uq’atexik ri b’anoj k’ax ri’.
Xuquej’ xub’ij che are rumal ri’ katerne’xik ri b’anoj chainem pa tinamit pa rachoch taq tijob’al xuquje’ rech kilik jawchi’ opaninaq wi ri jun b’anoj k’ax ri’ rech kab’an ri puqchajinem uq’atexik kumal e’ajchajin tinamit. “Uq’alik k’ax, ya’olchajinem xuquje’ suk’umalil ri’. jeri’ kab’an chech uq’atexik ri b’anoj k’ax chi kech ri ixoqib’”, xcha’.
Rumal ri’ le Ministerio rech Gobernación, Francisco Jiménez, sib’alaj xuya ub’ixik che pa aninaqil eri wokajil ajchajin tinamit are la’ qas kub’an upatan rech pa aninaqil kechap ri e’ajb’anol k’ax ri’. “Rumal ri’ xintaqon chi kech ri wokajil ajchajin tinamit rech ko ub’anik ri chajinem kakib’ano xuquje’ rech qastzij b’a’ kakichap nik’aj e’ajb’anol k’ax ri’”, xcha’ le Jiménez.
Are chi’ xchap ri jun achi, eri wokajil ajchajin tinamit xkik’am b’i pa q’atb’al tzij ri jun achi ri’, chi la’ k’ut kaq’at wi tzij pa uwi chi rij ri k’ax xub’ano. Eri q’atb’al tzij sib’alaj kakib’ij che ri b’iw ub’ixik loq kumal winaqil pa le uwachwuj pa kaqiq’, are la’ qas k’o nim upatanib’al rech pa aninaqil xchap ri jun achi ri’.