Rumal eri winaq xya loq ub’ixik ri’ rumal ri’ kimik eri e’ajchajin tinamit pa aninaqil xkesaj jun q’apoj ali 12 ujunab’ pa uq’ab’ jun achi b’anol k’ax chi rech, eri jun achi b’anol k’ax 30 ujunab’ ri’ are ub’i’ a Deibis Eduardo “N”. Eri jun ali chi la’ pa Chinautla xk’am wi loq rumal le jun b’anol k’ax, are la’ utzijol xnajb’ejsax rumal ri reqa’lenelab’ ri Comisaría 15.
Pa aninaqil, eri q’atb’al tzij xkijipij ub’ixik rech jun alerta Alba Keneth are ri’ qas xub’an upatan rech xterne’xik utzukuxik jun b’anoj k’ax ri’. Rumal ri tzukunem xb’an chi rij ri’, eri Comando Antisecuestros rech ri Wokajil Ajchajil Tinamit xumaj jun b’anoj utzukuxik uwach ri’ rumal ri’ xb’antaj kowonem xriqitaj loq ri jun q’apoj ali pa jun hotel rech ri zona 1 pa le uk’u’x nimatinamit rech Iximulew.
Rumal ri’ xb’antaj kowonem xchap loq jun ajb’anol k’ax chi rech ri jun ali ri’, ri jun achi xub’an ri k’ax xk’am b’i pa q’atb’al tzij chi rij ri k’ax xub’an ri’ xuquje’ rech kachomataj chi la’ k’ut. Xuquje’ eri e’ajchajin tinamit xkiya utzijol che ri jun achi ri’ taqom uchapik rumal ri q’atb’al tzij rumal xub’an k’ax chi rech jun chik ali, pa le junab’ 2024, xuquje’ eri jun chik umak ub’anom are k’ayin awan kunb’alil. E’are ri e’ajchajin tinamit ri xkiq’alajisaj che ri ali ri’ are xch’ab’exik rumal ri jun achi pa uwachwuj pa kaqiq’.
Pa le uwachwuj X, le Ministro rech Gobernación Francisco Jiménez xuya uq’ij kichak ri e’ajchajin tinamit rumal e’are xkesaj loq pa k’ax le jun q’apoj ali xuquje’ xkiya ub’ixik ucholaj ri k’ax kupetisaj chi kech ri ak’alab’ we ke’ok che ilon tzijol pa taq uwachwuj pa kaqiq’.
“Rajawaxik keqachajij ri qalk’uwal uj xuquje’ keqapixab’ej che kakib’an kuwenta chech ri tecnología ri’”, xcha’ le Ministro.
Kab’ix k’ut, che are ri jun achi xuk’am b’i ri q’apoj ali pa jun hotel ri’ chi la’ k’ut chap wi ri jun achi ri’ kumal ri e’ajchajin tinamit. Are chi’ xkesaj loq le ali chi la’, xb’an le rilik kumal rajeqa’lenel ri PNC kuk’ ri e’ajkunanel rech xkilo we utz uwach ri’.