Eri jun extraditable, Aler Baldomero Samayoa Recinos, ukojom b’i’aj “Chicharra”, are jun chi ke rajtaqanel nik’aj molaj b’anol k’ax rech narcotráfico ri’ ri kojom kib’i’ “Los Huistas” ri are xjach b’i kaq’ab’ rajq’atb’al tzij ri Administración rech ri Control rech Awan Kunb’al (DEA) rech ri Estados Unidos rech América, are chi’ xk’is ri q’atoj tzij rech xtaq b’i ri jun achi’ k’a pa Iximulew. Xuquje’ are jun ri’ chi ke ri e 100 ri sib’alaj taqom loq utzukuxik rumal ri nimatinamit EE.UU., ri’.
Sib’alaj chajim ri are xk’am loq pawe q’ij kimik pa le Rachoch Japache’ Tz’apib’al kech Achijab’ Mariscal Zavala, zona 17, k’a pa le Fuerza Aérea Guatemalteca (FAG), zona 13 ri’. Chi la’ k’ut xk’am wi b’i kumal ri Grupo Élite rech ri Sistema Penitenciario (SP) xuquje’ kumal reqa’lenel ri unidades especializadas rech ri Wokajil Ajchajin Tinamit (PNC).
Eri a Aler Samayoa taqom uchapik rumal le Corte Distrital rech Estados Unidos rech ri Distrito rech Columbia rumal le xuk’ayij b’i cocaína chi la’ k’ut, pane’ reta’m che are jun mak kub’ano, xutaq b’i pa k’ayinem ri awan kunb’al pa Estados Unidos ri’. Rumal ri’ ri are xchapik pa le 12 marzo kanoq, are chi’ xjach loq kumal ri q’atb’al tzij rech México pa kaq’ab’ ri wokajil ajchajin tinamit rech qatinamit ri’.
Eri tuzkunelab’ xkib’ij eri jun a Chicharra kuk’ nik’aj uwinaqil ri jun molaj b’anol k’ax ri’ e’are xkijach ri awan kunb’al cocaína pa nima’q taq jukub’ pa uwi palow xuquje’ pa tinamit ri’, ri xkiq’axe’j b’i pa kaq’ab’ nik’aj b’anol k’ax, xuquje’ ri xopan kumal k’a pa rulewal nimatinamit estadounidense.