Le viceministra rech Antinarcóticos xuquje’ rech Seguridad Fronteriza, Claudia Palencia, kimik are jun xk’oji chi la’ pa le nima tzijolinem b’ixik ub’i’ “La Ronda”, chi la’ k’ut xub’an wi utzijoxik ri chajinem q’atenik xb’an ri’ ruk’ ri ub’anob’alil chak taqom ub’anik rumal le Wokom K’amal B’e Taqanem pa Iximulew pa reqele’nib’al le Ministerio rech Gobernación ub’i’ (MINGOB) ri’ pa le kaq’atexik ri nuk’molaj b’anol k’ax rin aj kapetib’al pa uwachulew.
Pa le xub’ij ri’, le Viceministra Palencia sib’alaj xub’ij k’ut chi k’o nima kaq’atexik taq b’anom ri nik’aj molaj b’anol k’ax ri najil kepe wiri’ pa uwachulew. Xuya ub’ixik chi xchapik xtaq b’i ri narcotraficante ukojomb’i’aj “Chicharra”, kajtaqanel ri molaj b’anoj k’ax kib’i’ “Los Huistas”, ri xtaq b’i pa Estados Unidos rech América, ri kuk’ut kimik ri chak tajin pa reqele’n le k’amal b’e q’atb’al tzij qatinamit ruk’ suk’umal pa junamil ruk’ xuquje’ le ajchajin winaqil pa tinamit ri’.
“Le nima komontob’anik kuk’ ri wokaj taq nimatinamit, jacha ri EE.UU., k’o nim kipatanib’al kakib’an pa taq ri q’atenik kab’an pa reqale’n le viceministerio ri’”, xcha’ le Viceministra Palencia. Xuquje’ xub’ij ri’ chi e k’o kajib’ e q’apoj alaxik xeriqitaj loq ri k’o kitzijol ya’tal pa le Alerta Alba-Keneth, ri xeriqitaj ri’ pa jun nima puqtzukunem xb’an chi la’ pa Oratorio, Santa Rosa ri’.
Le nim patanel nan Palencia xuquje’ xub’ij chi k’o jun nima puqtzukunem chajinik xb’an ri’ rech uq’atexik ri narcotráfico, rumal ri’ xb’antaj kowonem xriqitaj loq awan kunb’al xuquje’ k’o nimaperaj taq tiko’n rech awan kunb’al xporoxik. Xuquje’ xub’ij che, “ri b’anoj q’atenik ri’ are jun nimachak katajin qumal rech kaq’atexik taq nik’aj molaj e b’anol k’ax ri’”. xcha’.
“Kojtajin na che uchakuxik ruk’ le ub’anikil taqom ub’anik rumal le Ministro rech Gobernación, Francisco Jiménez, xuquje’ ruk’ taq ri xutaq loq ub’ixik rumal le Nima K’amal B’e Bernardo Arévalo. Uj k’olik pa le eqele’nchak ri’ rech nima ub’anik ri qastzij chajinem ri’ xuquje’ ruk’ jun nima k’amow q’ab’al ub’anik”, xcha’ le Viceministra Palencia ri’.