E k’o oxib’ chi achijab’ ri xkaj xkikojo jun narcolaboratorio xechapataj loq kumal reqa’lenelab’ le División rech Información Policial (DIP) rech ri Wokajil Ajchajil Tinamit (PNC) pa jun tzukunem xb’an pa le manzana E, lote 15, lotificación Lo de Valdez, San José Pinula ri’, pa komonchak ruk’ ri MP. Eri kaq’atexik ri’ are xb’an kuk’ katob’anik le División Especializada rech Investigación Criminal (DEIC), le Grupo Especializado Ajq’atil taq Extorsiones ri’ (GECE), xuqje’ ruk’ katob’anik le Grupo rech Acción Rápida (GAR) ri’.
Eri xechapik xch’ob’ kiwach e’are k’ut a Hans N, 27 ujuna’, xuquje’ a César N, 20 ujunab’; eri keb’ winaq e’aj iximulew ri’ kachi’l ri jun mexicano ub’i’ Irán, 45 ujunab’. K’a pa le 30 rech abril kanoq, eri a Hans N ri are xchap pa jun q’atb’al tzij rech Chimaltenango, rumal kakeqaj b’i k’aqb’al q’aq’ man uwujilal, b’anoj k’ax xuquje’ rachib’al b’anoj k’ax. Eri rixoqil ri are xchap pa le 8 rech mayo kanoq, pa le zona 4 rech Mixco ri’.
Pa le katzukuxik ri’, eri wokajil ajchajin tinamit xkiriq loq 132 chi k’olib’alil ruk’ taq uk’u’x b’anob’al awan kunb’al, ruk’ kab’lajuj chi t’u’y ch’ich’ ri kojom rech yujib’al ri awan kunb’al ri’, xuquje’ e k’o pasil rech kakoj che tawarisab’al xuquje’ rech yatz’b’al ri’. Xuquje’ k’o Q12 mil chi pwaqil b’otolik xriqik, keb’ k’aqb’al q’aq’, waqib’ chi tolvas, jun b’anob’al rech k’aqb’al q’aq’, keb’ chi kamyonetiyas, jun chiyim k’olib’al ruk’ anfetamina xuquje’ ruk’ waqib’ chi ch’aweb’alil.
Eri tkukunem xb’an chi rij rech xterne’x utaqixik jun awan ch’awenik xb’an pa le 1561 rech Crime Stoppers, rech xya loq kitzijol nik’aj winaq che ri pa awalik keqam b’i awan jastaq oqxa’nib’al pa taq ri ch’ich’ ri’. Are chi’ xya’taj loq jun tzijol ri’, eri wokajil ajchajin tinamit xkimaj katzukuxik xuquje’ k’o puqtzukunen chajinik xkib’ano rumal ri’ xb’antaj kowonem xriqitaj ri’ ri jun narcolaboratorio ri katajin ukojik chi la’ pa le jun achoch winaq.
Eri q’atb’al tzij xkib’ij che rech kaq’alajisax uwach nik’aj chik b’anoj k’ax b’anom xuquje’ ruk’ taq ri k’ayin awan kunb’al ri’ pa uk’u’x nimatinamit. Eri e’oxib’ chi winaq xechap ri’ xek’am b’i pa taq q’atb’al tzij chi rij ri k’ax xkib’anoj xuquje’ rech kechomaxik.