Pa k’isb’al taq kajb’al, eri wokajil ajchajin tinamit xkib’an k’iyalaj taq puqchajinem pa taq ri nimab’e xuquje’ pa taq k’olib’al winaq pa tinamit rech uq’atexik taq ri b’anoj k’ax xuquje’ ri e’ajb’anol taq k’ax pa rulewal tinamit ri’. Jeri’ xya’taj utzijol kichapik kaq’atexik e 97 chi winaqilal pa rulewal tinamit ri’. Pa konojel e k’o 72 chi winaqil xechapatajik rumal k’o jalajoj ri k’ax xkib’an ri’ xuquje’ e k’o 25 chi winaqil ri’ xeriqitajik ketajin che b’anoj k’ax ri’ rumal ri’ xtaq loq kichapik rumal taq q’atb’al tzij.
Xchapataj k’ut al Emma N, 47 ujunab’, rumal kab’ixik xriqitaj rachib’al tz’ib’atalik ruk’ rech ri b’anoj k’ax chi ke taq ri ak’alab’ ri’; jeri’ ri al María N, 67 ujunab’, xuquje’ a Sergio N, 36 ujunab’ ri’, eri e keb’ ri’ eri kimak xkib’ano kab’ixik are xkimol ak’alab’ e q’apojil rech xkimino pa b’anoj k’ax rech achk’ulaj ri’. Ri xechapik pa taq puqchajinem xb’an pa San Luis xuquje’ Poptún, Petén ri’.
Pa le aldea Los Mixcos Marillanos, Palencia, chi la’ xchap wi loq a Julio N, 36 ujunab’ eri umak are b’anoj k’ax achk’ulaj chi ke taq ri ak’alab’. Eri’ e’are ri’ xtaq kichapik loq rumal ri jun Q’atb’al tzij rech Iximulew pa le 23 rech ik’ julio kanoq.
Eri achi ri’ are kab’ixik xub’an k’ax achk’ulaj chi ke e keb’ q’apoj ak’alab’ ri’, are chi’ eri e q’apoj ri’ k’ate lajuj pa oxlajuj kijunab’ ri’. Are chi’ xechapik, xek’am b’i pa taq ri q’atb’al tzij ri’ rumal k’o ri kimak kib’anom ri’.
Pa le b’anoj taq puqtzukunem ri’ xuquje’ xriqitajik loq keb’ chi k’aqb’al q’aq’ ri maj uwujil taq xuquje’ e k’o waqib’ chi ch’ich’ xeriqitaj ri e’elq’am b’i. Eri q’atb’al tzij sib’alaj xkiya uq’ij ri b’iw ub’ixik loq kumal ri winaqilal are ri’ xub’an upatan pa le kaq’atexik taq ri b’anol k’ax. Eri 110 rech PNC, ri 1531 rech Centro Anticorrupción Policial ri’, xuquje’ ri 1561 rech Crime Stoppers, rech k’o chi paq’ij chi chaq’ab’ ri’.