Eri tzukunelab’ rech ri Unidad Especial rech Investigación (UEI) xuquje’ rech Subdirección General de Análisis e Información Antinarcótica (SGAIA) rech ri Wokajil Ajchajil Tinamit xkichap loq jun achi ub’i’ a Daniel Zavala Ramos, uq’ab’emb’i’aj “Danny ZR”, 41 ujunab’, pa jun puqtzukunem xb’an pa le aldea El Boquerón, Joyabaj, Quiché. Ri te k’uri’ xk’am b’i pa xik’ach’ich’ pa le kaj k’a pa le Torre rech Tribunales, rech kachomax chi la’ chi rij ri ch’ijom k’ax xub’an chi ke ri winaqil.
Eri xq’alajin rumal taq ri tzukunem, eri Zavala Ramos xub’ij, che ri jun achi ri’ taqom loq uchapik rumal ri’ Estados Unidos rech América ri’. Are xterenb’ex utzukuxik chi rij ri k’ax xub’ano ub’i’ “Chiapas”, rumal ri’ xb’an k’iyalaj puqtzukunem ri’ pa le b’elejeb’ q’ij rech diciembre rech 2024. Ri are ri k’isb’al chi ke ri job’ chi extraditables e’uwinaqil ri jun molaj b’anol k’ax, ruk’ ri uchapik ri’ xb’antaj kowonem xeq’atexik ri jun molaj b’anol k’ax, rumal e’are b’a’ xikik’am b’i ri winaqib’ pa awalik pa Estados Unidos ri’.
Eri Taqawokajnel rech ri Ya’olchajinem pa Amaq’, Francisco Jiménez, pa le uwachwuj tzijol rech X, xub’ij: “Xaqachap k’ut ri jun uq’ab’emb’i’aj “ZR” ajtaqanel kech ri jun molaj b’anol k’ax kib’i’ ‘Los Chiapas’, rech kataq b’i pa extradición ri’. Eri jun molaj b’anol k’ax ri’ e’are xkib’an ri jun k’ax pa Tuxtla, MX, ri xekam wi ri winaqil e’aj iximulew”
Ruk’ ri uchapik ri’, e k’o chik e 20 chi extradibles e chapom chik rumal k’o jalajoj ri kimak pa junab’ ri’ xuquje’ are wa’ jun nim q’atenik xb’an chi ke nik’aj molaj b’anoj ch’ijom k’ax chi ke ri winaqil.
Eri kaq’atexik ri’ are la’ kuya uchuq’ab’ ri nim q’atenik tajin rumal ri Ministerio rech Gobernación, pa le kaq’atexik ri molaj b’anol k’ax pa nik’aj chik nimatinamit.