K’o jun nim eqa’nib’al awan kunb’alil rech cocaína xk’am loq pa xik’ach’ich’ pa kajil k’a rech ri Unidad Aérea rech ri Ministerio rech Gobernación (UNAGOB), ri xk’am loq k’a pa le Comando Naval rech ri Pacífico, k’o pa Puerto San José, Escuintla’, k’a pa taq uk’olib’al jataq ri Subdirección General rech Análisis rech Información Antinarcótica (SGAIA) rech ri Wokajil Ajchajil Tinamit (PNC), zona 6 rech runimal nimatinamit, rech xpaj ri rajilab’al kapajinik ri xriqitaj ri’.

Eri awan kunb’al ri’ are la’ xriqitaj pa le nim jukub’ch’ich’ rumal ri Marina rech ri Defensa Nacional, pa uwi palow rech ri Océano Pacífico ri’ pa le k’isqb’al wuqq’ij kanoq. Are chi’ xsolixik, eri wokajil e’ajq’atenel awan kunb’alil rech ri PNC, xkajilaj chi k’o 1,500 chi eqa’n pisom ri’ rech cocaína, ri e tastaj pa taq 50 k’olib’alil.

Pa le puqtzukunem ri’ e k’o waqib’ chi winaqil naj tinamit kapetik wi, xechapataj loq, ri xeriqik pa taq le nim jukub’ch’ich’. E’are k’ut nik’aj mexicanos ri xch’ob’ kiwach e’are ri’ a Roderico N, 48 ujunab’, ri xtaqataj chi jun k’aqb’al q’aq’ ri’; a Leo N, 42 ujunab’; a José N, 33 ujunab’; a Gilberto “N”, 23 ujunab’; a Miguel N, 44 ujunab’; xuquje’ ri jun salvadoreño a Milton N, 28 ujunab’.

Xuquje’ xriqitaj loq oxib’ chi ch’aweb’alil kuk’, oxib’ chokonsab’al GPS, keb’ chi ch’aweb’alil rech satelitales ruk’ jun ch’ich’ rech q’axeb’al tzij. Are wa’ jun nim q’atenik xb’an chi ke ri narcotráfico ri’ are wa’ jun nim q’atenik tajin rumal ri Wokom K’amal B’e rech Iximulew pa uchakunik taq ri Ministerios rech Gobernación (MINGOB) xuquje’ ri Defensa Nacional (MDN) ri’ pa le kaq’atexik ri nuk’molaj b’anol k’ax ri’ pa uwachulew.