Pa jun uq’atexik uwach q’atb’al tzij ri’ kumal ri raq’atb’al tzij rech ri Wokajil Japache’ ri’ chi rij ri xub’ij jun ixoq ajq’atol tzij ri xutaq uq’axexik pa le 17 rech septiembre kanoq, che ri jun achi ajpache’ ub’i’ a Aldo Ochoa Mejía, ukojomb’i’aj “El Lobo” ri’, xub’ij che kesax loq ri achi ri’ pa le Centro rech Detención rech Máxima Seguridad kech Achijab’ “Renovación I”, pa Escuintla, rech kaq’axexik pa le Centro rech Detención kech Achijab’ Fraijanes II, pa Fraijanes, Guatemala ri’.
Rumal ri’ eri Ministro rech Gobernación, Francisco Jiménez, pa le uwachwuj pa kaqiq’ ub’i’ X, xub’ij che xq’atij uwach ri’ rumal eri che ri jun achi ri’ are jun chi itzelalaj winaq ri’ ri kub’an k’ax chi ke ri winaqilal e’aj iximulew. “Eri jun ixoq ajq’atol tzij ri’ are xutaq resaxik loq ri achi ukojomb’iaj “El Lobo” rech Renovación I rech kaq’axexik pa Fraijanes II, are jun japache’ qast sib’alaj chajital tane’. Qas chi la’ k’ut che ri xutaq ub’anik wi ri k’ax kanoq”, xcha’.
Xuquje’, eri nima tat Jiménez sib’alaj xub’ij che qas xkitak’ab’a kib’ rech eri nik’aj taqanel ri pandilla rech ri Barrio 18 xuquje’ rech ri Mara Salvatrucha (MS) rech ya’tal taj pa kaq’ab’ rech ketaqanik xuquje’ rech man kek’oji ta chik jacha ri jastaq q’inomal xek’oji wi kanoq. “Eri weqale’n chak ri’ are kuk’ ri winaqila e’achalalil e’aj iximulew, are kuk’ ri kachalal ri kiriqom k’ax, kuk’ ri e’are ri qas toq’im wi ri kub’al k’u’x k’olemalil pa amaq’ tinamit.
Rajawaxik b’a’ kakich’ob’o che ri e k’o wi are japache’ tz’apib’al, xuquje’ man are taj rech ke’uxlan tane’ wi”, xcha’.
Eri xutaq ub’anik ri jun q’atb’al tzij ri’ xa’ kuya pa q’oxomal k’axk’onem pa tinamit xuquje’ xa’ kuk’ulele’j utzij ri Wokom K’amal B’e Amaq’ chech ri uchakunik ri Ministerio rech Gobernación rech kuq’atij pa juntir uwach ri’, rumal xesax ronojel ri utzil chi ke, rumal e chajim chi paq’ij chi chaq’ab’ xuquje’ rumal e q’atim nik’aj e’ajtaqonel ri pandillas rech kakib’an ta chik ri k’ax k’a pa taq ri japache’ tz’apib’al.
K’a pa le 31 rech julio, eri ukojomb’i’aj “El Lobo”, ruk’ nik’aj chik ajtaqonel rech ri Barrio 18, xuquje’ ri Mara Salvatrucha, e tz’apil ri’ pa le japache’ ub’i’ centro Renovación I. Eri kaq’atexik ri’ are la’ xub’ano rech xq’atataj uchuq’ab’ kipwaq kirajil ri’ xuquje’ xq’atataj kachuq’ab’ rech kakib’an ri k’ax nik’aj pandillas ri’, rumal k’ut e’are kakib’an ri k’ax chi ke ri winaqilal xuquje’ kakik’ule’lej ri chajinem winaqilal pa tinamit.