Pa le uq’atexik taq ri narcotráfico ri’, eri Wokajil Ajchajin Tinamit (PNC) xkiriq keb’ uk’olib’alil k’ayin awan kunb’alil pa taq ri tzukunem xb’an paq’ij domingo ri’, pa Coatepeque xuquje’ zona 6 rech uk’u’x nimatinamit.
Pa le nab’e puqchajinem xb’anik pa residencial Las Ramblas, Coatepeque, Xe’jaju’, xb’an kumal ri tzukunelab’ rech ri División Especializada rech Investigación Criminal (DEIC), xkichap oxib’ achijab’ ri’ are chi’ ketajin che b’anoj k’ax, e’are k’ut: a Fredy “N”, 30 ujunab’; a Jairo “N”, 32 ujunab’ xuquje’ ri jun colombiano ub’i’ a Cristian “N”, 35 ujunab’, xriqitaj kuk’ pa le nimaja jun k’aqb’al q’aq’ maj uwujil, jun tolw, 35 ub’aq’ k’aqb’al q’aq’, julajuj chi ch’aweb’al, keb’ pajib’al rech kemechakub’al ri’, jun k’olib’al xuquje’ waqxaqib’ pisoj ruk’ cocaína, job’ pajib’al rech marihuana, ruk’ k’i taq wujilal xuquje’ Q.25 mil 753 chi pwaqilem ri’, qaraj are k’u urajil ri awan k’ayin kunb’al. Xuquje’ xeriq b’i e k’o taq pickup, jun ch’ich’ xuquje’ keb’ chi kejach’ich’ ri’.
Eri ub’ixikil xya’taj kumal ri e’ajchajin tinamit, eri a Jairo “N” taq uchapik pa junab’ 2021 rumal xub’an k’ayin awan kunb’al ri’ xuquje’ rumal ri awan kunb’al xriq ruk’ rech kutijo.
Pa jun junamamil q’atenik xb’an rumal ri DEIC k’o waqxaqib’ chi nimaja k’olib’al rech k’ayin awan kunb’al xkiriq ri’ ri k’o pa uxukut ri nim k’ayib’al La Parroquia zona 6 rech uk’u’x nimatinamit ri’.
Eri puqchajinem tzukunik xb’antaj ri’ are chi’ xya loq utzijol kumal ri winaqilal pa le ub’ixik loq pa le 110, are chi’ ri winaqil xkitzuj loq chi k’o k’aqanem xb’an pa le nimaja xtzukux ri’. Are chi’ xe’opan ri q’atb’al tzij chi la’ k’ut xkichap loq e’oxib’ chi achijab’ e’are k’ut a Bacilio Blanco Rodríguez, de 26 años, ukojomb’i’aj “El Mapache” ri’; a Maynor Benancio Aceituno Aceituno, 49 ujunab’, ukojomb’i’aj “El Chino”; xuquje’ a Juan Carlos Sajbin Yoque, 54 ujunab’, ukojomb’i’aj “El Abuelo” ri’.
Chi la’ k’ut, xkiriqitaj wi keb’ chi k’aqb’al q’aq’ ruk’ 25 chi ub’aq’ k’aqb’al ri’ xuquje’ ruk’ keb’ nojisab’al uq’aq’ ri’, jun chi ke xa’ elq’am b’i xuquje’ ruk’ jun raqarik k’aqb’al Boiton, ruk’ oxib’ chi ub’aq’ k’aqb’al q’aq’ ri’.
Xya ub’ixik utzijol ri’ che ri nik’aj winaq xkaj xkiwajo nik’aj k’aqb’al q’aq’ pa jun k’olib’al ub’i’ tinaco ri k’o pa nimaja k’olib’al ri’. Xuquje’ chi la’ k’ut xriqitaj wi jun porob’al rech le Santa Muerte ri’.
Eri q’atb’al tzij rech ri Ministerio rech Gobernación ri’ sib’alaj xkiya utzijol chi k’o keb’ puqchajinem tzukunik xkib’an ri’ rech pa uq’atexik ri k’ayin awan kunb’al ri’, xuquje’ sib’alaj xya utzijoil ub’ixik che ri kichak ri’ are kakiq’atij kuwach ri narcotráfico ri’ xuquje’ pa juntir kuwach ri e’ajb’anol taq ri k’ax chi ke ri winaqil pa tinamit e’aj iximulew ri’.