Eri Wokajil Ajchajin Tinamit (PNC) xuya uchuq’ab’ ri ya’olchajinem winaqil chaq’ab’ iwir pa taq ri tzukunem xb’an pa kemonchak ri’, rech xesax ri k’aqb’al q’aq’ xuquje’ ri uq’atexik ri tijowtzam pa taq k’olib’em pa amaq’ tinamit. Eri uq’atexik ri’ are xb’an pa taq rulewal tinamit rech Petén, Retalhuleu, Santa Rosa, Alta Verapaz xuquje’ Chinab’jul, chi la’ k’ut xechap wi loq e wuqub’ chi winaqilal xuquje’ e k’o kajib’ chi k’aqb’al q’aq’ xriqitaj ri’.
Pa le zona 1 rech Retalhuleu, eri q’atb’al tzij xkichap loq a José “N”, 26 ujunab’, rumal reqam k’aqb’al q’aq’ ri’ maj uwujilal rech kakeqaj xuquje’ rech keqax pa taq etz’anemb’al. Xuquje’ xchap loq al María “N”, 30 ujunab’, ri xriqitaj k’olib’al ruk’ cocaína ri’.
Pa le aldea El Cuje, Pueblo Nuevo Viñas, Santa Rosa, eri reqa’lenelab’ ajchajin tinamit xkichap loq a Josué “N”, 31 ujunab’, pa jun k’ayib’al tzam reqam jun k’aqb’al q’aq’ marca Glock. Pane’ b’a’ xuk’ut uwuj ri k’aqb’al q’aq’ reqam, xchap b’i rumal q’ab’arel utijom tzam ri’.
Pa Santa María Cahabón, Alta Verapaz, xechap wi loq a Elmer “N”, 19 ujunab’, xuquje’ ri Deybi “N”, 29 ujunab’, kab’ixik xub’an elaq’ chi ke ri winaqil kewa’kat chi la’ k’ut. Pa le tzukunem ri’ xriqitaj loq jun k’aqb’al q’aq’ ri xeleq’axikk pa le 18 rech abril rech 2024 pa le colonia Kennedy, zona 18 rech uk’u’x nimatinamit.
Pa jun chik ri’, pa le barrio Saraxoch, San Pedro Carchá, Alta Verapaz, eri PNC xuchap loq a Elber “N”, 23 ujunab’, rumal kab’ixik reqam k’aqb’al q’aq’ maj uwujil ri’.
Pa k’isb’al ri’, pa le barrio El Cementerio Nuevo, Zacapa, xchap wi loq a Dylan “N”, 25 ujunab’ ri’, are chi’ reqam jun k’aqb’al q’aq’ Glock maj uwujil resam tane’ pa le DIGECAM.
Eri q’atb’al tzij xkiya utzijol che ri puqtzukunem ri’ man katanab’ ta ub’anik rech kaq’atexik ri b’anoj taq ri k’ax xuquje’ rech kaq’atexik reqaxik ri k’aqb’al q’aq’ pa amaq’ tinamit. Ri ak’ak’ Mingob, pa aninaqil ka’ilonik. Pa saqilal kachajinik.