Eri job’ e’ajb’anol k’ax e’uwinaqil ri jun molaj chi elaq’omab’ pa uwachwuj pa kaqiq’ xechap kumal reqa’lenelab’ ri Departamento rech Ciberdelitos xuquje’ Informativa Forense rech ri División Especializada rech Investigación Criminal (DEIC) rech ri Wokajil Ajchajin Tinamit (PNC), pa taq ri puqchajinem xkib’an pawe q’ij kimik pa kemonchak kuk’ taq ri ajq’atol tzij pa taq k’olib’alilm rech ri zona 17, San José del Golfo, xuquje’ pa Villa Nueva ri’.
Eri nik’aj xechapik xch’ob’ kuwach e’are k’ut al Fermi Regina Catalina Mansilla, 48 ujunab’; al Rina Isabel Recinos Lorenzo, 43 ujunab’; al Delmi Guisela Franco Peinado, 30 ujunab’; a Whilem Joel de León de la Cruz, 24 ujunab’; xuquje’ a Hugo Leonel Santizo Gregorio, 35 ujunab’, che ri k’o kimak xkib’ano poq’san pwaqil ruk’ nik’aj chik jastaq maj pa usaqilal.
Eri b’anoj taq tzukunem chi rij ri’, kub’ij che ri nik’aj winaq ri’ xechapik e’are xech’a’w apan pa taq ch’aweb’alil kuk’ ri winaqib’ che ri xkib’an elaq’ chi ke. Ri te k’u ri’ xesub’un chi ke are chi’ xkib’ij loq che keriqitaj pa Estados Unidos rech América che xtaq loq keqa’n kijastaq taqamul pa kib’i’ ri winaq ri’, ri k’o pa kaq’ab’ ri q’atb’al tzij pa taq ri aduanas ri’.
Te k’u ri’ kakib’ij chi ke che we kakaj kakik’ama ri kijastaq taqamul chi ke rajawaxik kakitojo Q5 mil pa Q50 mil ri’, pa taq ri kakitojo pa kib’i’ nik’aj chik winaq ri’. Rumal ri’ eri q’atb’al tzij xkib’ij che nik’aj elaq’omab’ ri’ e k’o winaq xejo’sin chi ke k’a pa Q200 mil chi pwaqil ri’.
Ri q’atb’al tzij kakib’ij chi ke ri winaqilal rech chakib’ana kuwenta rech mejo’stajik meqaj pa kaq’ab’ nik’aj elaq’omab’, nab’e na chetzijon apan kuk’ ri kachalal rech kakito we tzij ri kab’ix chi ke ri’, xak me’ok pa uwachwuj pa kaqiq’ we man k’ot rutzilal, chakikolo b’a’ ri kiwujpwaqb’al rech crédito xuquje’ débito ri’.
Xuquje’ sib’alaj kakib’ij chi ke ri winaqil rech chakkib’ana toq’ob’ rech chakib’ij loq kitzijol ri elaq’omab’ e’ajb’anol k’ax pa le 110 rech ri PNC, pa le 1561 rech Crime Stoppers, pa le 1574 rech Antiextorsiones, xuquje’ pa le 1577 rech Antinarcótica. Eri ub’ixik loq kumal winaq pa aninaqil kab’an le rilik kumal ri ajchajinelab’ ri sib’alaj kena’w che kachajixik ri winaqil pa taq ri nimaq’ij rech pa k’isb’al junab’ ri’.