Pa aninaqil k’ut eri reqa’lenelab’ ri Comisaría 16 rech ri Wokajil Ajchajin Tinamit (PNC) xekowon che kaq’atexik e kajib’ chi b’anol k’ax che ri e b’enq pa jun ch’ich’ che ri keqam wi b’i k’aqb’al q’aq’ maj uwujilal ri’. rumal ri’ eri e’are xechap pa 14 rech enero ri’ pa jun koqataxik xb’an kumal ajchajin tinamit pa le colonia La Florida, zona 19 uk’u’x nimatinamit.
E’are k’ut a Luis N, 50 ujunab’; ri Lesly N, 38 ujunab’; a Brandon N, 23 ujunab’; xuque’ al Lilian N, 24 ujunab’, e’are kab’ixik are chi’ xkilo xe’opan ri ajchajin tinamit, xeqaj pa jun ch’ich’ che ri e b’enaq wi man pa usuk’il ta kib’e ri’, xuquje’ are chi’ xkaj xekanimajik xakiwajo kib’ pa jun kachoch winaq. K’a chi la’ k’ut pa le nimaja ri’ xkik’aq wi loq ri e’ajchajin tinamit, ri man xetaqitaj taj.
Te k’u ri’, eri wokajil ajchajin tinamit xkiterne’j ub’anik ri e taqom wiri’, xe’ok pa le kachoch winaq chi la’che ri xeriqitaj wi nik’aj winaq xechap ri’ rech xechap pa aninaqil ri’. Are chi’ xechapik, eri nik’aj winaq ri’ kab’ixik xriqitaj keb’ raqarik k’aqb’al q’aq’ kuk’, jeri’ jun chik k’aqb’al q’aq’, jun nojisab’al rech xuquje’ jo’lajuj chi ub’aq’ k’aqb’al q’aq’ ri’, ri maj uwujilal xkik’ut tane’.
Konojel nik’aj winaq ri’ xechapik xek’am b’i pa q’atb’al tzij chi rij ri kimak xkib’ano. Rumal ri’ eri q’atb’al tzij xkimaj uq’alajisaxik kiwach rech kakilo jas ri xkik’am wi loq ri k’aqb’al q’aq’ xriq kuk’ rech kilik jas ri xkikoj wiri’ pa taq ri b’anoj k’ax.