Pa jun kemon puqtzukunem pa wokajilal, eri reqa’lenelab’ ri Grupo Élite rech ri Sistema Penitenciario (SP) xuquje’ ri reqa’lenelab’ ri wokajil chajinelab’ rech ri Wokajil Ajchajin Tinamit (PNC) xkiterne’j b’anik ri chajinem pa Japache’ kech Achijab’ rech ri zona 18 ri’, are uwach taq ri chajinem chi’ rech uk’ub’isaxik ri chajinem pa rachoch taq ri japache’ tz’apib’al ri’.
Pa taq ri puqtzukunem, eri q’atb’al tzij xekowon che resaxik pa k’ax e 8 chi rajchajinel ri SP, ri xeyut kanoq chi la’ kumal nik’aj e’ajpache’. Eri reqa’lenelab’ ri japache’ ri’ utz kiwach xe’esax loq xuquje’ e chajim kumal ri q’atb’al tzij chi la’. Jeri’ are uwach ri puqtzukunem, rumal ri’ pawe q’ij kamik tajin ri jun tzukunem pa le Sector 11 rech ri Preventivo ri’, rech taqim utzukuxik uriqik ri awam jastaq ri’ xuquje’ rech b’anoj chajinem chi la’ k’ut, xya nab’ejsab’al utzijoxik, che e k’o keb’ k’aqb’al q’aq’ ruk’ kajib’ ch’aweb’al rech eqam xriqitaj ri’.
Eri ministro rech gobernación Marco Antonio Villeda, pa le tzijolinem tzij xub’an ri’ xuya ub’ixik pawe q’ij kamik, xub’ij wari’: “man qachomam taj kaqaya kiq’ij e’ajkajmanelab’, man kaqab’ij taj che xojq’itaj tane’, are kojtajin che b’anik ri utzilem pa qatinamit”. Jeri’ xub’ij che le Ministerio ri’ sib’alaj kub’ij k’ut che ri eqa’lenel qacha ri’ are rech pa amaq’el kaqab’an ri chajinem pa rachoch taq japache’ xuquje’ kow ub’anik ri chajinem kaqab’an ri’ pa le ucholalejil pa amaq’ tinamit.