Pa jun ya’el nim uq’ijol ri ajchajinel a Sergio Iván García Hernández, ujulajuj chi ajchajinel ri xkamisax pa chajinem pa amaq’ tinamit, k’a xuk’isob’ej wari’, ri uchak xub’an are ri patan chajinem pa amaq’ tinamit ri’. Rumal ri’ xya uq’ij ruk’ jun nimajem, maltyoxinik, ukajmaxiuk xuquje’ rumal xuya kanoq jun loq’ k’utub’al pa le Wokajil Ajchajin Tinamit (PNC).
Eri rachalal ri eqa’lenel ri’ xuk’ul apan ruk’ jun nimalaj nimajem ropanib’al ri’ xuquje’ sib’alaj xkikoq’ej, telem k’ut chuwi kitaleb’ ri rachi’l k’a chi la’ pa le Galería rech Nim Q’ijol rech ri Dirección General rech ri PNC. “Man k’ot chik, xkamik pa uchak b’anoj chajinem rumal”, are ri’ le tzij xb’itaj pa junamamil ub’ixik kumal ri e rachi’l are chi’ xtotajik ri ub’i’ pa le ilom solinik xb’an kumal ri wokajil chajin tinamit.
Eri ministro rech Gobernación, Marco Antonio Villeda, ri xumaj b’i le nim tzijob’enik rech ya’ik uq’ij le kaminaq, xloq’axik ronojel uk’u’x ranima’ xub’an ri chajinem pa tinamit rumal ri eqa’lenel ri’, a García Hernández, jun loq’ utz achi ri’ ri xkamisax pa uchak chajinem ri’”. Kaqaj uj kaqaya’o nim uq’ij unimajem, rech umaltyoxixik ri uchak rech man kasach ta kanoq, rumal k’ut eri taqawokajil k’asal uwach ri’ rumal ri eqa’lenelab’. Man xaq ke’l kanoq ri’”, xcha’.
Xuquje’ eri Taqawokajnel rech ri Ya’olchajinem pa Amaq’ xub’ij chi ke ri rajtaqanel ri PNC, rech kab’an ya’ik nim uq’ijol una’texik ri loq’ eqa’lenel ri’, a García Hernández, are jun loq’ achi’ ri xkamisaxik pa le uchak chajinem. Xuquje’ xub’ij chi ke ri wokajil ajchajil tinamit rech sib’alaj kakichajij kib’, rech kakib’an ri suk’ilal, xuquje’ ruk’ pa jikomalil xuquje’ pa utz winaqilem jacha ri kub’ij ri taqanik pawe taq q’ij ri’.
Eri nim k’amal b’e pa Junamamil rech ri PNC, a Héctor Prera, sib’alaj xub’ij che ri eqa’lenel, a García Hernández, xub’an ri uchak ruk’ jun loq’ unimanik ruk’ ronojel uchuq’ab’ ranima’. “Sib’alaj k’ax kaqana’o ri ub’ik ri’, rumal b’a’ eri kaqakoj ri atz’iyaqb’al ri’, qeta’m chi k’o jun ri qachi’l pa le atz’iyaq ri’, ri e k’o rachalalil, ri k’o uchik’am xuquje’ ri k’o jun loq’ uk’aslemal ri kasach uwach pawe q’ij kamik”, xcha’.
“Eri eqa’lenel a Sergio García are xucha’o rech xb’e ronojel q’ij pa chajinem winaqilal aj iximulew, pane’ b’a’ reta’m chi teren ukamik chi rij wari’. Eri tijowk’ax rumal man kasach ta kanoq, eri ub’i’ ri are pa amaq’el kak’oji pa qana’tib’al ri uj k’o pa le taqawokajil, xuquje’ eri jujun chak nimanem kuya uq’ij rech kaqana’tij”, xcha’ ri k’amal b’e Prera.
Eri a García Hernández, ri are aj pa Guazacapán, Santa Rosa, xok pa le 29 rech marzo rech 2019, pa le wokajil chajin tinamit rech ri PNC. Ri uchak xub’ano are sib’alaj loq’, ruk’ ronojel ranima’ xuquje’ ruk’ ri loq’ unimanik pa le q’ijol xk’oji pa le la Subdirección General rech Análisis rech Información Antinarcótica (SGAIA) ri’, ri Distrito Central ri’, ri Comisaría 32 ri’, ri División rech Protección rech Personas xuquje’ Seguridad (DPPS) ri’, k’ate ri’, xk’oji pa le Comisaría 14 ri’.
Eri loq’ ajchajinel ri’ xkam ri’ pa jun k’aqanem xb’an chi ke kumal nik’aj ajb’anol k’ax e xib’ib’anel are che ketajin che puqtzukunem pa Villa Lobos II, zona 12 rech Villa Nueva, ri xk’ulmataj kanoq pa le q’ij domingo 18 rech enero ri’. Are chi’ xek’aqik, eri a García Hernánde, xk’am b’i pa le IGSS 7-19 El Ceibal, chi la’ k’ut xukunax wiri’ pane’ b’a’ xukunax kumal e’ajkunanelab’ chi la’, ri are xkamik pa le 31 rech enero kanoq.
Sib’alaj k’ax b’a’, xuriqo rumal xe’uya kanoq ri jun alaj umi’al k’ate kajib’ ujunab’.