Kuk’ ri e job’k’al chi reqa’lenelab’ ri wokajil ajchajin tinamit ruk’ ri Departamento rech Tránsito rech ri Wokajil Chajin Tinamit (DT-PNC) chaq’ab’ iwir xkiq’atej jumulaj chi e’ajkejach’ich’ ri man ya’tal taj xkilatzij ri b’e pa nimatinamit. Sib’alaj pa aninaqil k’ut eri e’ajchajin tinamit xkiq’atej kiwach nik’aj e’ajkejach’ich’ rumal xkilatz’ij kib’e winaq e’ajb’insal ch’ich’ pa nimatinamit, xuquje’ rumal sib’alaj xkininisaj kiqul pa nimatinamit.
Le Ministro rech Gobernación, Francisco Jiménez, pa le uwachwuj pa kaqiq’ rech X, sib’alaj xuya wi ub’ixik chi k’o 113 chi tojob’al xkikoj ri’ xuquje’ e k’o kajib’ chi kejach’ich’ xkichap loq. Xuquje’, le Jiménez xuya utzijol ri jun achi rumal xk’ulmataj ri latz’ininik ri are aj chi la’ rech nimatinamit Colombia, are k’o umak kab’ixik xe’utaqchi’j loq le e’ajb’insal kejach’ich’ ri xkilatz’ij pa nimatinamit, xkiq’atij uwach nimab’e xuquje’ k’o ri k’ax xkipetisaj pa nimatinamit. “Kaqilo we ri jun influencer colombiano ri’ kutoj ri kitojoib’al ri e’ajb’insal taq kejach’ich’”, xcha’.
Eri q’atb’al tzij xkib’ij, chi roojel ri tojob’al xkoj ri’ are rumal man k’ot kiwujil keqam rech kakib’insaj kikejach’ich’, rumal kikojom nim kiqul xtanik ri kikejach’ich’, rumal man k’ot kiplacas keqam rech kakib’insaj ri kikejach’ich’ ri man ya’tal taj ri’, xuquje’ rumal k’o nik’aj chik kimak xkib’an pa uq’ab’ ri Taqanik Tzij rech Tránsito xuquje’ pa le Retab’anojil. Xuquje’ k’o 13 chi wujil ok’owinaq chik uq’ij xriqitajik xuquje’ rumal e k’o kejach’ich’ ri’ man k’ot kiwujil eqam rech kakib’inisaj.
Eri puqchajinem q’atenik ri’ are la’ xb’an pa komon chakunem rumal le Wokom K’amal B’e rech Iximulew pa le uchakunik le Ministerio rech Gobernación (MINGOB) rech ya’ik uchuq’ab’ ri chajinem pa nimab’e, rech uq’atexik taq ri b’anonem man ya’tal taj, xuquje’ rech kechajixik ri winaqilal kewa’katik pa nimab’e pa nimatinamit.