Pa aninaqil k’ut eri reqa’lenelab’ le Comisaría 11 rech ri Wokajil Ajchajil Tinamit (PNC) xekowon che kachapik e job’ chi kamisanelab’ e’uwinaqil ri molaj b’anoj k’ax rech ri Mara Salvatrucha (MS-13).
Ri are xchap loq kimik pa le colonia Manuel Colón Argueta”, zona 3 rech uk’u’x nimatinamit.
Are k’ut a Henry N, 23 ujunab’, “Cevjchero” uq’ab’em ub’i’ kab’ixik; a Pablo N, 18 ujunab’, “Chuy” uq’ab’em ub’i’ kab’ixik; a Elmer N, 18 ujunab’, ri q’ab’em ub’i’ eta’mixnaq “Barny”, xuquje’ e k’o keb’ ab’om xek’am b’i pa q’atb’al tzij ke’uchomaj ab’om alitom k’o ri kimak. Eri nik’aj winaq ri’ e’are kab’ixik xkib’an k’i b’anoj k’ax ri’, e’are k’ut xkib’an jun kaq’anik pa le zona 18 uk’u’x nimatinamit xuquje’ ruk’ nik’aj chik b’anoj k’ax ri’ ri katajin uq’alajisaxik ri’.
Eri wokajil ajchajin tinamit xkiriq k’ut keb’ chi k’aqb’al q’aq’ maj uwujil, keb’ k’olib’al ub’aq’ k’aqb’al q’aq’ xuquje’ 106 chi ub’aq’ k’aqb’al q’aq’ ri rech utz kakojik. Xuquje’ xriq 25 chi nitz’ wonaj k’olib’al ruk’ ri marihuana ri’, wuqub’ uware k’olib’al ruk’ cocaína, keb’ pajib’al kemechakub’al, jun rijxa’ xuquje’ job’ chi ch’aweb’al rech eqam are kuya uchuq’ab’ ri q’alajisanem tajin ub’anik kumal ri ajeqa’lenem tzukno’jchak chi rij ri’.
Pa le jun puqchajinem ri’ xuq’alajisaj wari’ rumal le Wokom K’amal B’e Amaq’ pa le uchakunik le Q’atb’al tzij rech Taqom Ya’olchajinem pa Amaq’. Eri q’atb’al tzij xkimaj ub’anik ri tzukno’jchak rech kakiib’an kachapik nik’aj winaq che ri k’o jalajoj b’anoj k’ax kib’anom xuquje’ rech katerne’x rilik jawchi’ xkoj wi ri k’aqb’al q’aq’ che ri xriqitaj ri’.